मलको विषयलाई लिएर सिम्रौनगढमा झडप

बाराको सिम्रौनगढ नगरपालिका वडा नं ४ मा रासायनिक मलको विषयमा विवाद हुँदा दुई पक्षबीच झडप भएको छ । वडा कार्यालयमा लगाइएको तालाबन्दी खोल्ने विषयमा भएको विवादले उग्र रुप लिँदा झडप भएको हो ।

वडा कार्यालयले पाएको रासायनिक मल वितरण गर्न मंसिर १५ गतेदेखि १८ गते आइतबारसम्म किसानलाई नागरिकतासहित आवेदन दिन माग गरेको थियो । केही किसान १८ गते अपरान्ह मलका लागि आवेदन दिन पुगेका थिए । तर उनीहरु पुग्दा वडा कार्यालय बन्द भइसकेको थियो ।

अपरान्ह ४ बजेसम्म खोल्नुपर्नेमा अगाडि नै बन्द गरेका कारण मलका लागि आवेदन दिन आफूहरु वञ्चित भएको भन्दै उनीहरुले वडा कार्यालयमा तालाबन्दी गरेका थिए । मंगलबार सोही तालाबन्दी खोल्न लाग्दा विवाद झडपमा परिणत भएको छ ।

वडा प्रहरी कार्यालय सिम्रौनगढका अनुसार वडा कार्यालयमा गरिएको तालाबन्दी अझै खुल्न सकेको छैन । दुवै पक्ष लाठीभाटा लिएर बसेका कारणस्थिति अझै तनावपूर्ण रहेको स्थानीय पत्रकार रामेश्वर मेहताले जानकारी दिएका छन् ।

कपिलवस्तुका न्यायाधीश गिरीमाथि बलात्कारको आरोप

कपिलवस्तुका जिल्ला न्यायाधीश भुवन गिरीमाथि एक महिलालाई बन्धक बनाएर यौन शोषण गरेको आरोपमा अनुसन्धान सुरु भएको छ ।

पीडितले आफूलाई बन्धक बनाएर यौन शोषण गरेको आरोपमा उजुरी दिएपछि जिल्ला प्रहरी कार्यालय कपिलवस्तुले अनुसन्धान थालेको हो ।

पीडित महिलाले न्यायाधीश गिरीविरुद्ध सुरुमा कपिलवस्तु प्रहरीमा उजुरी गरेकी थिइन् । तर, कपिलवस्तु प्रहरीले उजुरी लिन नमानेपछि पीडित महिला एक साताअघि राष्ट्रिय मानव अधिकार अयोग र महिला आयोगमा पुगेर उजुरी दिइन् ।

दुवै आयोगले कपिलवस्तु प्रहरीलाई उजुरी लिएर छानबिन गर्न निर्देशन दिँदै पत्र पठाएका थिए । मानव अधिकार आयोगले त न्यायपरिषदलाई समेत उजुरी र पत्रको बोधार्थ पठाएको थियो ।

‘शारीरिक बन्धक बनाएर न्यायाधीशले यौन शोषण गरिरहेको उजुरी हामीकहाँ एक हप्ता अगाडि आइपुगेको थियो । हामीले कपिलवस्तु प्रहरीलाई उजुरी लिएर छानविन गर्न निर्देशन दिएका छौं’, मानव अधिकार आयोगकी सदस्य लिली थापाले भनिन्, ‘न्यायाधीशको विषय भएकाले न्यायापरिषदलाई पनि पत्र पठाएर यस विषयमा अनुसन्धान गर्न आग्रह गरेका छौं ।’

मानव अधिकार आयोगका अनुसार, उजुरीमा न्यायाधीश गिरीमाथि पीडित महिलालाई करिब ५ वर्षदेखि बन्धक बनाएर यौन शोषण गरिरहेको आरोप छ । राष्ट्रिय मानवअधिकार आयोगकी सदस्य लिली थापाले पीडितले आयोगमा आएर पटकपटक करणी गरेर गर्भपतन गर्न लगाएको पनि खुलाएकी छन्।

महिला आयोगका अनुसार, पीडित महिला ०७५ देखि नै न्यायाधीशसंग थिइन् ।

आयोग स्रोत भन्छ, ‘हामीले न्यायाधीशलाई पनि सम्पर्क गरेर यस विषयमा बुझेका थियौं ।’ महिला आयोगका एक पदाधिकारीका अनुसार, पीडितलाई मनोवैज्ञानिक परामर्श दिने काम समेत भइरहेको छ ।

राष्ट्रिय मानव अधिकार आयोग, न्यायपरिषद सचिवालय र राष्ट्रिय महिला आयोगले समेत सोधपुछ र अनुसन्धान थालेपछि न्यायाधीश गिरी १५ दिने बिदा बसेका छन् ।

जिल्ला प्रहरी कार्यालय, कपिलवस्तुका प्रमुख एसपी प्रेमबहादुर बस्नेतले मानव अधिकार आयोगको पत्राचारका आधारमा छानबिन भइरहेको बताए ।

उनले अनलाइनखबरसँग भने, ‘मानव अधिकार आयोगबाट प्राप्त पत्रलाई प्रक्रियामा लगेका छौं ।’

स्रोतका अनुसार, प्रहरीले न्यायपरिषदसँगको समन्वयमा छानबिन अघि बढाएको छ । पक्राउ गर्नैपर्ने भए न्यायपरिषदको अनुमति पाएपछि मात्रै प्रक्रिया अघि बढाउने प्रहरीको तयारी छ ।

उजुरी परेपछि न्यायपरिषदले समेत छानबिनका लागि एकजना सदस्यलाई जिम्मेवारी दिइसकेको स्रोतले बतायो । स्रोतका अनुसार, ती सदस्यले मंगलबारदेखि नै सोधपुछ लगायतका काम थालेका छन् ।

न्यायपरिषद सचिवालयका प्रवक्ता मानबहादुर कार्कीले भने उजुरीका बारेमा आफूलाई जानकारी नभएको प्रतिक्रिया दिए ।

आफूमाथि छानबिन सुरु भएपछि न्यायाधीश गिरीले उच्च अदालत तुलसीपुरको बुटबल इजलासबाट १५ दिन विदा लिएका छन् ।

उच्च अदालत तथा जिल्ला अरु न्यायाधीशहरुले उजुरी परेपछि गिरीले विदा लिएको बताए । एक न्यायाधीशले भने, ‘हामीले पनि उहाँमाथि छानबिन प्रक्रिया अघि बढेको सुन्यौं, १५ दिन विदा लिएर बस्नुभएको हो ।’

रवीन्द्र मिश्रको चुनाव खर्च साढे २४ लाख

काठमाडौं क्षेत्र नम्बर १ प्रतिनिधि सभा सदस्य उम्मेदवार रवीन्द्र मिश्रले चुनावी खर्च सार्वजनिक गरेका छन्।

मंगलबार प्रेस विज्ञप्ति जारी गर्दै चुनावी खर्च साढे २४ लाख भएको जानकारी दिएका हुन्।

राष्ट्रिय प्रजातन्त्र पार्टी (राप्रपा)बाट उम्मेदवारी दिएका उनले २४ लाख ४९ हजार ६०७ रुपैयाँ खर्च भएको विवरण निर्वाचन आयोगमा पेश गरेका छन्।

उनले चुनावी खर्च गर्न सार्वजनिक रूपमा आर्थिक सहयोगका लागि अपिल गरेका थिए। २०७४को चुनावमा पनि उनले साढे २१ लाख खर्च गरेका थिए।

आयोगले काठमाडौं-१मा २५ लाख खर्च गर्न पाउने सीमा तोकेको थियो। उक्‍त रकम जम्मा भएपछि आफूले भिडिओ सन्देशमार्फत सहयोग नगर्न पनि भनेका थिए।

त्यसपछि पनि रकम आएर कूल ३३ लाख जम्मा भएको उनले जानकारी दिएका छन्। र बाँकी रहेको साढे ८ लाख काठमाडौं क्षेत्र नम्बर १ सरोकार कोषमा राखिने उनले उल्लेख गरेका छन्।

नयाँ संसदमा दुई तिहाइ सांसद ५० देखि ७० वर्षका, ८० वर्ष माथिका ३ जना

हालै सम्पन्न प्रतिनिधि सभा सदस्य निर्वाचनमा प्रत्यक्षबाट निर्वाचित १६५ जना सांसदमध्ये अधिकांश ५१ देखि ६० वर्ष उमेर समूहका निर्वाचित भएका छन्।

यो उमेर समूहका ७५२ जना प्रतिस्पर्धामा उत्रिएकोमा ६८ जना उम्मेदवार विजयी भएका छन्। अर्थात् कुल सांसदको ४१.२१ प्रतिशत यहीँ उमेर समूहबाट सांसद हुने भएका छन्।

यस्तै ६१ वर्षदेखि ७० वर्षसम्मका ३२४ उम्मेदवारमध्ये ४४ जना विजयी भएका छन्। विजयी भएका १६५ प्रत्यक्ष सांसदमध्ये यो उमेर समूहबाट २६.६७ प्रतिशत छन्।

त्यसपछि सर्वाधिक विजयी हुने उमेर समूहमा ४१ देखि ५० वर्षसम्मका ३० जना छन्। अर्थात् कुल सांसदमध्ये १८.१८ प्रतिशत विजयी हुने सांसदमा यहीँ उमेर समूहका छन्। यो उमेर समूहबाट ६९९ जनाले उम्मेदवारी दिएका थिए।

यस्तै ७१ देखि ७५ वर्ष उमेर समूह र २५ देखि ४० उमेर समूहबाट समान १०-१० जना विजयी भएका छन्।

७१ देखि ७५ वर्षसम्मका ४८ जनाले उम्मेदवार दिएका थिए भने २५ देखि ४० वर्ष समूहका ७५९ जनाले उम्मेदवार दिएका थिए।
यस्तै यसपालि ८० वर्षभन्दा माथिका १० जनाले उम्मेदवार दिएकोमा ३ जना सांसद निर्वाचित भएका छन्।

Esewanic
नवनिर्वाचितमध्ये राष्ट्रिय स्वतन्त्र पार्टीका ३ जना, नेकपा एमाले र नागरिक उन्मुक्ति पार्टीका २-२ जना तथा कांग्रेस, माओवादी र राप्रपाका १-१ जना ४० वर्ष नकटेका सांसद छन्।

प्रत्यक्षमा निर्वाचितमध्ये काठमाडौं-२ की सोविता गौतम सबैभन्दा कान्छी सांसद हुन्। २७ वर्षीया गौतम राष्ट्रिय स्वतन्त्र पार्टीबाट निर्वाचित भएकी हुन्।

यस्तै प्रतिनिधिसभा सदस्यबाट निर्वाचित मुस्ताङका २९ वर्षीय योगेश गौचन थकाली कांग्रेसका ३० वर्षमुनिका एक्ला सांसद हुन्। जुम्लाबाट निर्वाचित राप्रपाका ज्ञानेन्द्र शाही पनि ३० वर्षकै उमेरमा संसद छिर्ने भएका छन्।

यस्तै स्वतन्त्र पार्टीबाटै ललितपुर–३ मा निर्वाचित तोसिमा कार्की ३३ वर्षकी छन्।

यस्तै नागरिक उन्मुक्ति पार्टीका कैलाली–२ बाट निर्वाचित अरुणकुमार चौधरी र माओवादी केन्द्रका अनललाल मोदी ३७ वर्षका छन्। यस्तै कैलाली–१ बाट निर्वाचित रञ्जिता श्रेष्ठ रचितवन १ बाट चुनिएका हरि ढकाल ३९ वर्षीका छन्।

मकवानपुर-२ बाट निर्वाचित एमालेका ४० वर्षीय महेश बर्तौला र बारा-३ बाट निर्वाचित एमालेकी ज्वालाकुमारी साह ४० वर्षीया हुन्।

प्रत्यक्षमा निर्वाचितमध्ये ७० वर्ष माथिका १४ जना छन्। जसमा ७९ वर्षसम्मका १० जना छन् भने ८० वर्षभन्दा तीन जना छन्।

लोकतान्त्रिक समाजवादी पार्टीका महन्थ ठाकुर ८०, राष्ट्रिय जनमोर्चाका चित्रबहादुर केसी ८१ र माओवादीका महिन्द्र राय यादव ८५ वर्षका हुन्।

इन्गेजमेन्ट टुटेपछि जलेको अवस्थामा भेटिएकी युवतीको मृत्यु, ४ जनाविरुद्ध जाहेरी

दरबारमार्गस्थित केल्मी ब्राण्डको शोरुम सञ्चालक पुष्पा न्यौपानेको जलेर मृत्यु भएको छ ।

विवाहका लागि गरिएको इन्गेजमेन्ट टुटेपछि केटा पक्षकहाँ गएकी उनी आइतबार जलेको अवस्थामा भेटिएकी थिइन् । उनको मृत्यु शंकास्पद भएको भन्दै परिवारले प्रहरी वृत्त, महाराजगञ्जमा किटानी जाहेरी दिएको छ ।

प्रहरी वृत्त, महाराजगञ्जका अनुसार न्यौपानेले आइतबार केटा पक्षको धुम्बाराहीस्थित घर गेट अगाडि आत्महत्या गर्न पेट्रोल खन्याएकी थिइन् । तर, उनलाई बचाउनुको साटो नरोकी आत्महत्या गर्न दुरुत्साहन गरेको परिवारको दाबी छ ।

परिवारले प्रहरीमा दिएको किटानी जाहेरीमा केटा पक्षले घरमा समेत बोलाएर मानसिक यातना दिएको भनिएको छ । प्रहरीका अनुसार शरीरमा पेन्ट्रोल खन्याएर आगो लगाएको अवस्थामा उनलाई उद्दार गरेर कीर्तिपुरस्थित बर्न सेन्टरमा पुर्‍याइएको थियो ।

सोमबार बिहान साढे ९ बजे उनको उपचारका क्रममा मृत्यु भएको जिल्ला प्रहरी परिसर, काठमाडौंका एसपी दिनेशराज मैनालीले बताए ।

न्यौपानेको मृत्यु भएपछि न्यौपानेको परिवारले इन्गेजमेन्ट गरेका २९ वर्षका मधु संग्रौलासहित उनको परिवारका सुधन संग्रौला, ५७ वर्षका दिनेश संग्रौला र बिन्दु संग्रौलाविरुद्ध आत्महत्या दुरुत्साहनमा जाहेरी दिएको छ । एसपी मैनाली भन्छन्, ‘जाहेरी दर्ता भएपछि प्रहरीले अनुसन्धान गरिरहेको छ ।’

परिवारका अनुसार संग्रौला दरबारमार्गस्थित शोरुममा आउने क्रममा २०७८ को माघ महिनादेखि चिनजान भएको थियो । एकअर्काबीच फोन र सामाजिक सञ्जालमा कुराकानी हुने क्रममा उनीहरु प्रेम सम्बन्धमा थिए । त्यसक्रममा एकअर्काको घरमा समेत आउजाउ हुने गरेको उनीहरुको भनाइ छ ।

त्यसक्रममा दुवै जनाले विवाह गर्ने भनेपछि दुवै पक्षको मञ्जुरीमा १८ भदौमा इन्गेजमेन्ट भएको न्यौपाने पक्षको भनाइ छ । त्यसक्रममा एक वर्षभित्र विवाह गर्ने सहमति भए पनि १७ कात्तिकमा एकाएक केटा पक्षले इन्गेजमेन्टको दक्षिणा र गरगहना फिर्ता गरेको केटी पक्षको भनाइ छ ।

‘प्रतिवादीले मानसिक यातना दिएपछि घटना हुनुअघि उनले म मर्नुभन्दा अर्को विकल्प रहेन भन्दा पनि घरमा बोलाएर समेत मानसिक यातना दिए’, न्यौपानेले दिएको जाहेरीमा भनिएको छ ।

परिवारले प्रहरीसँग सुधन र पुष्पाबीच फेसबुक म्यासेन्जर, भाइबर र ह्वाटस एपसहित कल डिटेल विवरण बुझेर अनुसन्धान गर्न पनि माग गरेको छ ।

कतार विश्वकपको चर्चित ९७४ नामको रङ्गशाला भत्काइँदै

विश्वकप फुटबलको आयोजक कतारले आफ्नो एक रङ्गशाला केही दिनमा नै भत्काउने तयारी गरेको छ। कतार विश्वकपका लागि तयार गरिएको अस्थायी रंगशालाका रूपमा रहेको स्टेडियम ९७४ भत्काउन लागिएको अन्तराष्ट्रिय सञ्चारमाध्यमले जनाएका छन्।

विश्वकपकै लागि मात्र निर्माण गरिएको स्टेडियम ९७४ पूर्ण रूपमा भत्काइने जनाइएको छ। नामका कारण चर्चामा रहेको स्टेडियम ९७४ मा विश्वकपका ७ खेलहरू आयोजना भएका थिए।

यो रङ्गशालामा अन्तिम खेलका रूपमा सोमबार राति ब्राजिल र दक्षिण कोरियाबीच प्रि-क्वाटरफाइनलको खेल भएको थियो। जहाँ ब्राजिलले ४-१ प्रभावशाली जित निकाल्दै क्वाटरफाइनलमा स्थान पक्का गर्‍याे।

स्टेडियम ९७४ करिब ४० हजार दर्शक क्षमताको रहेको थियो। यो रङ्गशालामा खेर गएका स्टिल ९७४ वटा सिपिङ कन्टेनर प्रयोग गरेर बनाएका कारण यसको नाम नै ९७४ स्टेडियम राखिएको थियो।

साथै, कतारको कन्ट्री कोड समेत ९७४ हो, सोहीअनुसार यसको प्रयोग गरिएको थियो। यो अस्थायी रङ्गशाला भएकाले पूर्ण रूपमा भत्काइने जनाइएको छ।

ललितपुरको ग्वार्को चोकमा देशकै पहिलो फ्लाई ओभर शुक्रबार देखि निर्माण शुरु हुने भएको छ

अन्तर्राष्ट्रिय मापदण्डअनुसार यस फ्लाइओभरको उचाइ ६ मिटर हुने केन्द्रले जनाएको छ । दुई वर्षभित्र निर्माण सम्पन्न हुने गरी एम/एस आशिष–समानान्तर (जेभी)ले ठेक्का पाएको छ । फ्लाईओभरको विस्तृत् परियोजना प्रतिवेदन (डीपीआर) जियोकम/बीडीए/रेज (संयुक्त)ले तयार गरेको हो ।

फ्लाइओभरको कुल लम्बाइ ४५५ मिटर हुनेछ । फ्लाइओभरको ग्राउन्ड क्लियरेन्स ६ मिटर हुनेछ । सो फ्लाइओभरको उचाइ ५।५ मिटरको हुनेछ ।

सडक विभागका अनुसार १४ महिनामा निर्माण सम्पन्न हुनेछ। १७ करोड ६८ लाख लगानीमा निर्माण गर्ने गरी ठेक्का सम्झौता गरेर निर्माण कम्पनीहरूले गत फागुनदेखि आयोजनाको डिजाइन बनाउन सुरु गरेका थिए। डिजाइन गत साता मात्रै सडक विभागबाट स्वीकृत भएको थियो।

काठमाडौं उपत्यका ट्राफिक प्रहरी कार्यालयले निर्माण कार्य सम्पन्न नभएसम्म ट्राफिक व्यवस्थापन मिलाउन सूचना समेत जारी गरेको छ।

प्रहरी कार्यालयले कोटेश्वरबाट सातदोबाटोतर्फ जाने यात्रुबाहक, मालबाहक तथा दुई पाङ्ग्रे सवारीसाधनहरूलाई बालकुमारी पुलबाट सर्भिस लेनमा जाने व्यवस्था मिलाएको छ। यस्तै साना चारपाङ्ग्रे सवारी साधनहरूलाई फाष्टट्रयाकबाट चलाइने छ।

यसैगरी कोटेश्वरबाट सातदोबाटोतर्फ जाने र आउने सबै सवारीलाई ग्वार्को चोकभन्दा ६ सय मिटर अगाडि र पछाडि सर्भिस लेन हुँदै जान दिइने प्रहरी कार्यालयले जनाएको छ।

बल्खुबाट सातदोबाटो हुँदै कोटेश्वरतर्फ आउने यात्रुबाहक, मालबाहक तथा दुईपाङ्ग्रे सवारीलाई बल्खुबाट सर्भिस लेनमा र साना चारपाङ्ग्रे सवारीलाई फाष्टट्रयाकबाट संचालन गरिने प्रहरी कार्यालयले जानकारी दिएको छ।

जग्गा विवादमा दाइको हत्या गरेको आरोपमा २० वर्षीय युवक पक्राउ

भारतको झारखण्डको खुन्ती जिल्लामा २० वर्षीय युवकले २४ वर्षीय दाइको हत्या गरेको घटना सार्वजनिक भएको छ ।

हत्यापछि अभियुक्तले टाउको काटेर सेल्फी लिएको प्रहरीले जनाएको छ । मृतकका बुबा दसाई मुण्डाले डिसेम्बर २ मा यस सम्बन्धमा एफआईआर दर्ता गरेका थिए।

त्यसपछि प्रहरीले गत आइतबार मुख्य अभियुक्त र उनकी श्रीमतीसहित ६ जनालाई पक्राउ गरेको छ।

एफआइआरमा ५५ वर्षीय दसाई मुण्डाले भनेका छन्, ‘उनको छोरा कानु मुण्डा डिसेम्बर १ मा घरमा एक्लै थिए । अरू सबै काम गर्न धान खेतमा गएका थिए। साँझ घर फर्किएपछि उनका भतिजा सागर मुण्डा र साथीले छोरा कानु मुण्डालाई अपहरण गरेको गाउँलेले बताए ।’

छोरा कतै नभेटेपछि बुबाले भोलिपल्ट एफआइआर दर्ता गराएका थिए ।

आरोपितलाई पक्राउ गरेपछि कुमाङ गोप्ला जङ्गलमा मृतकको शरीर र त्यसबाट १५ किलोमिटर टाढा दुल्वा तुङ्दी क्षेत्रमा टाउको फेला परेको मुर्हु प्रहरी चौकीका इन्चार्ज चुडामणि टुडुले बताए ।

हालसम्म पाँच थान मोबाइल, दुई रगतले लतपतिएको धारिलो हतियार, एउटा बञ्चरो र एउटा एसयूभी बरामद गरिएको प्रहरी अधिकृत टुडुले बताए ।

हत्याको मुख्य कारण मृतकका परिवार र अभियुक्तबीच लामो समयदेखि चलिरहेको जग्गा विवाद रहेको टुडुले बताए । बीबीसी

सरकार गठनअघि ३४ पदाधिकारीको भागबन्डा चुनौती

निर्वाचनको अन्तिम परिणाम घोषणा गर्ने समय नजिकिँदै जाँदा सरकार गठनमा दलहरू केन्द्रित भएका छन्। तर सरकार गठनअघि संघ र प्रदेशमा रहेका ३४ पदाधिकारीको भागबन्डा मिलाउने विषय चुनौतीपूर्ण बन्दै गएको छ। सरकार गठनका लागि सत्तारूढ गठबन्धनले बढी अग्रसरता देखाए पनि एमालेले समेत गुप्त ढंगले आफ्नो तयारी अघि बढाइरहेको छ। निर्वाचनबाट कुनै पनि राजनीतिक दलले बहुमत प्राप्त गर्न नसकेका कारण संविधानको धारा ७६ (२) बमोजिमको सरकार गठन गर्नुपर्ने अवस्था छ। संविधानको धारा ७६ (२) मा ‘दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधिसभाको सदस्यलाई राष्ट्रपतिले प्रधानमन्त्री नियुक्त गर्नेछ’ भन्ने व्यवस्था उल्लेख छ।

मंसिर ४ गते भएको निर्वाचनमा प्रतिनिधिसभामा सत्ता गठबन्धनअन्तर्गत प्रत्यक्ष र समानुपातिक गरी नेपाली कांग्रेसले ८९ सिट, माओवादी केन्द्रले ३२ सिट, नेकपा एकीकृत समाजवादी (नेकपा एस) ले १०, लोकतान्त्रिक समाजवादी पार्टी (लोसपा) ले ४, राष्ट्रिय जनमोर्चाले १ सिट (प्रत्यक्ष मात्र) जितेका छन्। अहिलेको सिट संख्या हेर्दा सत्तारूढ गठबन्धनलाई २ भन्दा बढी सिट संख्या भएको दलको समर्थन आवश्यक पर्छ। प्रदेशसभामा प्राप्त सिट हेर्दा पनि सत्ता गठबन्धनले नै सरकार गठन गर्न सक्ने संख्या देखिन्छ। तर संघ र प्रदेशमा ३४ पदाधिकारीको भागबन्डा गर्दा सरकारमा बहुमत पु¥याउने दललाई पनि पदाधिकारी दिनुपर्ने भए भागबन्डा मिलाउन अझै चुनौतीपूर्ण देखिने विश्लेषण छ। निर्वाचनमा सत्ता गठबन्धनमा आबद्ध कांग्रेस, माओवादी केन्द्र, नेकपा एस, राष्ट्रिय जनमोर्चा र लोसपाले तालमेल गरेर चुनाव लडेका थिए भने एमालेले अर्को गठबन्धन गरेर चुनावी प्रतिस्पर्धा गरेको थियो।

सत्तारूढ गठबन्धनको बैठक सोमबारबाट प्रधानमन्त्री निवास बालुवाटारमा सुरु भएको छ। छलफलमा चुनावी समीक्षा गरिए पनि ३४ पदाधिकारीका भागबन्डामा सहमति नभई सरकार गठनको सम्भावना नदेखिएको स्रोतको भनाइ छ। ३४ पदाधिकारीमा भागबन्डा नमिलेको खण्डमा सत्तारूढ गठबन्धन टुट्न पनि सक्ने एक नेताले बताए। ‘अब मिलीजुली सरकार गठन गर्नुपर्ने बाध्यता छ। सरकार गठनअघि संघ र प्रदेशसम्म पदाधिकारीमा सहमति खोज्नुपर्छ,’ उनले भने। संघमा राष्ट्रपति, उपराष्ट्रपति, प्रधानमन्त्री, सभामुख, उपसभामुख, राष्ट्रियसभा अध्यक्ष, उपाध्यक्षको भागबन्डा गर्नुपर्ने अवस्था छ भने सात प्रदेशहरूमा प्रदेश प्रमुख, मुख्यमन्त्री, प्रदेश सभामुख, उपसभामुखलगायत पदमा प्याकेजमै सहमति खोज्नुपर्ने अवस्था आएको स्रोतले बताएको छ। राष्ट्रियसभाका अध्यक्षको पद पनि एक वर्षपछि सकिने हुँदा अहिल्यै सहमति खोज्नुपर्छ,’ स्रोतले भन्यो।

संघ र प्रदेशमा पदाधिकारीको भागबन्डामा सहमति खोज्नुपर्ने विषयमा केन्द्रित हुँदा पनि सरकार गठनमा ढिलाइ हुन सक्ने अनुमान गरिएको छ। निर्वाचन आयोगले एक साताभित्र अन्तिम परिणाम सार्वजनिक गर्ने तयारी गरेको छ। निर्वाचन परिणाम राष्ट्रपतिसमक्ष पेस भएपछि सरकार गठन र संसद् अधिवेशनको आह्वान गर्ने काम अघि बढाउनुपर्छ। अन्तिम परिणाम आएपछि पदाधिकारीमा भागबन्डा नमिलेसम्म सरकार गठन गर्ने अवस्था सहज नदेखिएकाले राजनीतिक दलबीच गृहकार्य गरी भागबन्डा मिलाउनुपर्ने अवस्था देखिएको स्रोतले बतायो। सबै भागबन्डा सकिएपछि मात्र गठबन्धन औपचारिक रूपमा अघि बढ्ने भएको छ। पाँच दलीय गठबन्धनले अनौपचारिक रूपमा छलफल गरे पनि अहिलेसम्म सहमति नभएको स्रोतले बताएको छ। भागबन्डामा कांग्रेस माओवादी केन्द्र र नेकपा एसले मात्र नभई अन्य दलको पनि सहमति खोज्नुपर्ने अवस्था आएको छ।

अघिल्लो पाँचवर्षे कार्यकालमा साढे दुई वर्ष सबै पदाधिकारीमा एमाले र माओवादी केन्द्र मिलेर बनेको नेकपाको वर्चस्व थियो। एमाले र माओवादी केन्द्र संघदेखि प्रदेशसम्म भागबन्डा गरेर एकीकरण गरेकाले उनीहरूकै वर्चस्व रहेको थियो। संघमा राष्ट्रपति र प्रधानमन्त्री एमालेले, उपराष्ट्रपति र सभामुख माओवादी केन्द्रले, उपसभामुख एमालेले, राष्ट्रियसभाको अध्यक्ष एमालेले, उपाध्यक्ष माओवादीले लिएका थिए। राष्ट्रियसभाका र प्रतिनिधिसभाका समितिमा समेत एमाले र माओवादी केन्द्रको वर्चस्व थियो। नेकपाभित्र विभाजन नआउने बेलासम्म कांग्रेसले प्रतिनिधिसभामा सार्वजनिक लेखा समिति र राष्ट्रियसभामा दिगो विकास समितिको सभापति मात्र पाएको थियो।
नागरिक दैनिक

बिहेभोजले पाल्पाका ८० जनाभन्दा बढी बिरामी

मंसिर १७ गते शनिबार बगनासकाली गाउँपालिका-१, चिर्तुङधारास्थित दानबहादुर गाहाको छोरीको बिहेमा भोज खाएकाहरु बिरामी परेको बिरामी गुनबहादुर गाहाले बताए । ताराबहादुर गाहा, रिखीराम गाहा, दलबहादुर गाहा, गुनबहादुर गाहा लगायत दर्जन बढी परिवारका सबै बिरामी परेका छन् । चिर्तुङधारा स्वास्थ्य चौकी प्रमुख सिअहेव अधिकृत नोदप्रसाद बस्यालका अनुसार ७० जना बिरामीलाई सोमबार जाँच गरिएको थियो ।

बिरामी भएकाहरुलाई ज्वरो आउने, पखाला लाग्ने, टाउको दुख्ने, वाकवाकी लाग्ने, वान्ता हुने लगायतका समस्या देखिएको उनले बताए । अधिकांशलाई औषधि वितरण गरिएको छ । तर औषधिले काम नगरेपछि स्थानीय स्वास्थ्य संस्था, तानसेनका निजी स्वास्थ्य संस्था र मिसन अस्पतालमा पुगेका थिए । कतिपयले आइतबार खप्न सकिन्छ कि भन्ने भएपनि सोमबार भने अधिकांश बिरामी आत्तिएर अस्पताल पुगेका थिए ।

मिसन अस्पतालका अनुसार सोमबार २२ जना बिरामी उपचारका लागि आएका थिए । त्यसमध्ये चार जनालाई भर्ना लिएर उपचार गर्नु परेको छ । अस्पतालका व्यवस्थापक जीवन भट्टराईका अनुसार सबै बिरामी खतरामुक्त भएपछि घर पठाइएका हुन् । ‘घरमा आए पनि हामीलाई धेरै समस्या भएको छ,’ स्थानीय दानबहादुर गाहाले भने, ‘पेट खाएको खायै छ ।’

वडाध्यक्ष शेरबहादुर रानाका अनुसार बिहे भएको घरमा गएर भोज खाने प्राय: सबै बिरामी परेकाले समस्या आएको छ । ‘कतिपय घरमै सहेर, खटाएर पनि बसेका छन्,’ उनले भने, ‘घरका प्राय: सबैजसो बिरामी भएको अवस्था छ । कतिपयले सहनै नसक्ने भएपछि मात्र बिरामीहरु अस्पताल गएका हुन् ।’ के कारणले ‘फुड पोइजन’ भयो भन्ने अनुमानसमेत गर्न नसकेकिएको वडाध्यक्ष रानाले बताए । यहाँ प्युठान नगरपालिका–६, गुरुङगाउँबाट जन्ती आएका थिए ।

बिरामी भएकाहरुका अनुसार घरमा ल्याएको बटुकमा कुनै समस्या नदेखिएको बताएका छन् । भोजमा पाडा (राँगो) को मासु, पुलाउ, आलु र गोभीको तरकारी, मेवाको अचार, बटुक, आलु मुलाको अचार थियो । कतिपयले पानी धमिलो देखिएको र पानीकै कारण पनि हुन सक्ने आशंका गरेका छन् । प्यूठानमा समेत भोज खाएर गएकाहरु बिरामी परेका छन् । जन्ती आएका प्यूठानका एकै गाउँका ४५ जना बिरामी परेका छन् । स्वास्थ्य चौकी चिर्तुङधाराले मंगलबार पनि बिरामीको जाँच गर्ने जनाएको छ । बिरामीको अवस्था फलोअप गरेर औषधि वितरण गरिने स्वास्थ्य चौकी प्रमुख बस्यालले बताए ।