कोरोना संक्रमणको नयाँ भेरियन्ट ओमिक्रोन पत्ता लगाउने प्रविधि विस्तार गरिएको छ । अहिलेसम्म टेकूस्थित राष्ट्रिय जनस्वास्थ्य प्रयोगशालामा मात्र हुँदै आएको थियो । अबदेखि राष्ट्रिय जनस्वास्थ्य प्रयोगशालासहित अन्य ६ प्रयोगशालामार्फत जिन सिक्वेइन्स गरिने भएको छ । स्वास्थ्य तथा जनसंख्या मन्त्रालयका अनुसार वीर अस्पताल, निजामती कर्मचारी अस्पताल, वीरेन्द्र सैनिक अस्पताल, त्रिवि शिक्षण अस्पताल, प्रदेश जनस्वास्थ्य प्रयोगशाल प्रदेश नम्बर २ र भेरी अस्पतालबाट एस–जीन स्क्रिनिङ गर्ने सुविधा थपिएको हो ।आगामी दिनमा थप स्थानमा पनि आवश्यकताको आधारमा थप गर्न सकिने मन्त्रालयकी प्रवक्ता डा. संगीता कौशल मिश्राले जानकारी दिइन् । कोरोना संक्रमण पत्ता लगाउनको अहिले देशभर ८९ वटा प्रयोगशाला छन् । ती सबै राष्ट्रिय जनस्वास्थ्य प्रयोगशाला मातहत छन् ।