काठमाडौं । स्थानीय संरचना बदलिएलगत्तै नेकपा (एमाले) ले पार्टीको सांगठनिक ढाँचालाई त्यसअनुसार पुनर्गठनको काम सुरु गरेको छ । साबिकको क्षेत्रीय, इलाका, गाउँ र नगर कमिटीलाई नयाँ स्थानीय तहको संरचनाअनुसार रूपान्तरण गर्ने गरी एमालेले जिल्ला मातहतका सबै कमिटी पुनर्गठन गर्ने अभियान अघि बढाएको हो । गत ५ गते अन्तरपार्टी निर्देशन (सर्कुलर) जारी गर्दै महाचिव ईश्वर पोखरेलले १५ चैतभित्र स्थानीय तहको नयाँ संरचनाअनुसार जिल्ला मातहतका कमिटी पुनर्गठत गरिसक्न निर्देशन दिएका थिए । आगामी ३१ वैशाखका लागि तोकिएको स्थानीय तहको निर्वाचनको समयसीमाको ‘काउन्ट डाउन’ सुरु भइसकेकाले एमालेले ती काम यथाशीघ्र सम्पन्न गरेर उम्मेद्वार छनोट प्रक्रिया अघि बढाउने योजना बनाएको छ । उम्मेदवार छनोटसम्बन्धी मापदण्ड र कार्यविधिसमेत छिट्टै जारी हुने जनाउँदै महासचिव पोखरेलले पहिले आन्तरिक सांगठनिक पुनःसंरचनाको काम यथाशीघ्र सम्पन्न गर्न निर्देशन दिएका छन् ।
गत २७ फागुनबाट स्थानीय तहहरूको नयाँ संरचना कार्यान्वयनमा आएपछि चार महानगरपालिका, १३ उपमहानगरपालिका, २ सय ४६ नगरपालिका र ४ सय ८१ गाउँपालिका र त्यसअन्तर्गत ६ हजार ६ सय ८० वटा वडा गठन भइसकेका छन् । यसलाई मध्यनजर गर्दै एमालेले जिल्ला कमिटीलाई कार्यकारी भूमिकामै राखेर तलका कमिटीलाई भने गाउँपालिका, नगरपालिका र वडा कमिटीमा रूपान्तरण गर्ने गरी पुनर्गठन गर्ने काम सुरु गरेको हो ।

यसरी बन्दै छ, एमालेको गाउँपालिका र नगरपालिका
एमालेले गाउँपालिका र नगरपालिकाको कमिटीमा घोषित गाउँपालिका र नगरपालिकाको भूगोलभित्र पर्ने साबिकका सबै गाउँ÷नगर कमिटीका पदाधिकारीहरू, इलाका कमिटीका पदाधिकारी र सदस्य, निर्वाचन क्षेत्रीय कमिटीका पदाधिकारी र सदस्यहरू पदेन सदस्य रहने तथा जिल्ला कमिटीका वरिष्ठ सदस्यहरूमध्येबाट संयोजक÷सहसंयोजक चयन गरेर गाउँपालिका कमिटी बनाउन निर्देशन दिएको छ । सचिव भने कमिटीबाटै निर्वाचित गर्न भनिएको छ । त्यस्तै, साबिकका गाउँ कमिटीलाई वार्ड कमिटी तथा वार्ड कमिटीलाई टोल कमिटीमा रूपान्तरित गर्न भनिएको छ ।

त्यस्तै, निर्वाचन क्षेत्रीय कमिटीका पदाधिकारी र सदस्य तथा गाउँ कमिटीका अध्यक्षहरू रहेको गाउँपालिका कमिटी रहेको सचिवालय निर्माण गर्न एमालेले निर्देशन गरेको छ । नयाँ घोषणा भएका नगरपालिका र उपमहानगरपालिकामा पनि गाउँपालिकाकै शैलीमा जिल्ला कमिटीको वरिष्ठ सदस्यलाई संयोजक र सहसंयोजक चयन गर्न निर्देशनमा भनिएको छ ।
। वडाहरू टुक्रिएका गाउँ र नगरपालिकाका पार्टी कमिटीका पदाधिकारी र सदस्यहरूको हकमा मतदाता जहाँ पर्छ, त्यतैको गाउँपालिका वा नगरपालिका कमिटीमा समायोजन हुने सर्कुलरमा उल्लेख छ । यो निर्देशनअनुसार एमालेले कम्तीमा सातदेखि नौ वटासम्म पुराना गाउँ र इलाकाका साथै क्षेत्रीय कमिटीका पदाधिकारी र सदस्यहरूसमेत मिलाएर छुट्टाछुट्टै गाउँपालिका र नगरपालिका कमिटी बनाउनेछ । गाउँ कमिटीलाई भने वडा कमिटीमा तथा वडा कमिटीलाई टोल कमिटीमा रूपान्तरण गर्न एमालेले भनेको छ । सीमांकनको मुद्दा थाँती राखेर निर्वाचनका लागि प्रस्ट मुद्दाका साथ मधेसी मोर्चा आएको खण्डमा सत्तापक्ष र प्रतिपक्ष साझा निष्कर्षका लागि तयार भएपछि

उम्मेदवारको मापदण्ड छिट्टै
महासचिव ईश्वर पोखरेलले तत्काल नयाँ संरचनाअनुसार साविकका कमिटी पुर्नगठित गर्न निर्देशित गर्दै छिट्टै उम्मेदवार छनोटको कार्यविधि पठाइने सर्कुलरमार्फत जनाएका छन् ।