काठमाडौं- अमेरिकी सरकारले कोरोना भाइरस (कोभिड–१९) को जोखिममा रहेका नेपालसहित विश्वका २५ देशहरूमा भाइरसबाट बच्न पूर्व तयारी र रोकथामको लागि करिब ३ करोड ७० लाख अमेरिकी डलर सहयोगको घोषणा गरेको छ।
उक्त रकम अन्तर्राष्ट्रिय विकासको लागि अमेरिकी एजेन्सी (यूएसएआईडी) र विश्व स्वास्थ्य संगठन (डब्लूएचओ) मार्फत खर्च गरिने उल्लेख छ। यूएसएआईडीका कार्यक्रमहरु सञ्चालन गर्ने बहुपक्षीय संस्थाहरूबाट पनि रकम उपलब्ध गराइने छ।
अफगानिस्तान, अंगोला, इन्डोनेसिया, इराक, काजाकिस्तान, केन्या, दक्षिण अफ्रिका, ताजाकिस्तान, फिलिपिन्स, तुर्केमेनिस्तान, उज्वेकिस्तान, जाम्बिया, जिम्बाबे, बंगलादेश, म्यानमार, कम्बोडिया, इथोपिया, किर्गिस्तान, मंगोलिया, लाओस, नाइजेरिया, पाकिस्तान, थाइल्यान्ड र भियतनामका लागि उक्त रकम सहयोग गर्ने अमेरिकाले जनाएको हो ।
उक्त सहयोग अन्तर्गत डब्लूएचओले ती मुलुकहरुमा हालको लागि भाइरसको परीक्षण गर्ने, आपतकालीन सार्वजनिक स्वास्थ्य सुरक्षामा सहयोग गर्ने, आवत–जावत गर्दा नाकाहरूमा स्वास्थ्य परीक्षण गर्ने, संक्रमण बारेमा अनुसन्धान गर्ने, आवश्यक प्रविधिहरु उपलब्ध गराउने, स्वास्थ्यकर्मीहरुलाई प्रशिक्षण दिने जस्ता काम गर्नेछ।
