कालिकोटमा एक बाबुले घरमा आगो लगाउँदा दुई छोराको मृत्यु भएको छ । जिल्लाको नगहरिनाथ गाउँपालिका–७ दुदुल्लिका भैरव बटालाले आफ्नै घरमा आगो लगाउँदा १२ वर्षीय गणेश बटाला र ८ वर्षीय मनबहादुर बटालाको मृत्यु भएको छ । उनका तीन छोरामध्ये ४ वर्षीया खगेन्द्र बटाला भने घाइते भएको जिल्ला प्रहरी कार्यालय कालिकोटले जानकारी दिएको छ । घाइतेको स्वास्थ्य चौकी कुमालगाउँ (नरहरिनाथ गाउँपालिका–३) मा उपचार भइरहेको छ ।
आफूले विष पिएर आगो लगाएको बताए पनि प्रहरीले त्यससम्बन्धी अनुसन्धान गरिरहेको जिल्ला प्रहरी कार्यालय कालिकोटका प्रहरी निरीक्षक भूपेन्द्र शाहीले जानकारी दिए ।
‘घटना भएको स्थानमा इप्रका कुमालगाउँ नरहरिनाथ ३ को टोली पुगिसकेको छ,’ प्रहरी निरीक्षक शाहीले भने, ‘जिल्ला प्रहरीबाट मेरो नेतृत्वमा प्रहरीको टोली गइरहेको छ । त्यहाँ पुगेपछि घटनाको थप तथ्य पत्ता लाग्नेछ ।’
