प्रधानमन्त्री केपी शर्मा ओलीले कि त वैकल्पिक सरकार बनाउन कि आफ्नो नेतृत्वको सरकारमा सहभागी हुन दलहरूलाई आह्वान गरेका छन् ।
शुक्रवार सम्पादकहरूसँगको अन्तरक्रियामा प्रधानमन्त्री ओलीले आज दिनभरको समय रहेकाले सरकार बनाउन विपक्षी दलहरूलाई चुनौती दिएका हुन् ।
आज दिनभरीमा सरकार बनाउन नसक्ने हो भने आफ्नो नेतृत्वको सरकारमा सहभागी हुन उनको आह्वान छ ।
‘दिनभरी समय छ । गए भो नि, वैकल्पिक सरकार बनाए भो नि । म फेरि पनि आग्रह गर्छु- वैकल्पिक सरकार बनाउनुस् । सधैँको किचकिच होइन, सहयोगी भावनाका प्रतिपक्षमा बस्छु,’ प्रधानमन्त्री ओलीले भने, ‘सक्नुहुन्न भने मलाई समर्थन गर्नुस् । कसले विघटन गर्छ संसद् ? मलाई समर्थन गर्नुस् । सबै सहभागी हौं यो महामारीका बेला । हामी सबै मिलेर कोभिड १९ का विरुद्ध एकजुट हौं। तपाईंहरू आउनुस् ।’
उनले आज बिहान मात्र कांग्रेस सभापति शेरबहादुर देउवालाई फोन गरेर आफूले कि त वैकल्पिक सरकार दिन कि आफ्नो सरकारमा सहभागी हुन आह्वान गरेको उनले बताए ।
‘शेरबहादुर देउवालई बिहान फोन गरेर कुरा गरें । सरकार बनाउनुस्, प्रतिपक्षमा बसेर शान्त र सहयोगी भूमिकामा रहन्छौं,’ देउवालाई आफूले फोनमा भनेको कुरा उद्धृत गर्दै ओलीले भने, ‘होइन भने आउनुस्, मेरो नेतृत्वमा राष्ट्रिय सरकार बनाऔं । राष्ट्रिय राजनीतिलाई विभाजनको बाटोमा लाने बाटोमा मात्र नलाग्नुस् ।’
