विष्णुप्रसाद पोखरेल
दमक/ झापाको दमकको कोभिड उपचार केन्द्र बेलडाँगीमा कोरोना संक्रमितको चाप बढेको छ । यसका साथै कोभिडका विरामीको उपचार गराउदै आएको आम्दा अस्पताल दमक र एडभान्स हस्पिटलको अवस्था पनि उस्तै रहेको जनाईएको छ । झापामा सबैभन्दा बढि कोभिड प्रभावित तथा संक्रमणदर धेरै भएको स्थानीय तहमध्ये दमक नै रहेको छ । दमक नगरपालिका प्रमुख रोमनाथ ओलीले एक सार्वजनिक कार्यक्रममा शनिवार जनाए अनुसार दमकमा परिक्षण गरिएकाहरुमध्ये ६० प्रतिशतसम्मलाई कोरोना संक्रमण देखिएको छ ।
शनिवार सार्वजनिक भएको विवरण अनुसार दमक कोभिड उपचार केन्द्रमा ४२ जना उपचाररत रहेकाछन् । ३० बेड पुर्ण क्षमता भएपनि केहि थप आईसुलेसन वार्डहरु पनि रहेकाछन् । अब बेडमामात्र होइन, कुर्सिमा समेत राखेर उपचार गराउने अवस्था छैन, कोभिड फोकल पर्सन देबी दंगालले भनेकीछन् । कोभिड अस्पतालको बेड मात्र हैन कुर्सीहरु पनि भरिए अब बाकी कतै छैन है, उनले सामाजिक सञ्जाल फेसबुकमा लेखेकीछन् ।
यसैगरी दमककोे आम्दा अस्पतालमा २७ र एडभान्स अस्पतालमा १८ जना कोभिडका विरामीको उपचार भइरहेको छ । दुबै अस्पतालमा आईसियु र भेन्टिलेटर बेड पाईने अवस्था रहेको छैन । अस्पतालमा भर्ना गरेर विरामी उपचार गर्न सक्ने अवस्था नरहने स्थिति आउन लागेको अस्पतालहरुले जनाउन थालेकाछन् । गम्भिर अवस्थाका ६ जना विरामीको भेन्टिलेटरमा राखेर उपचार भइरहेको पनि जानकारी दिईएको छ ।
कोरोना संक्रमण धेरै नै बढेको भन्दै दमकमा कडा किसिमको लकडाउन गर्नु पर्ने सुझाव यहाँका सम्पूर्ण राजनीतिक दल तथा सरोकारवाला निकायहरुले सुझाव दिएपनि यो कार्यन्वयन हुन सकेको छैन । यस बिषयमा प्रभावकारीन्यूजले बारम्बार रुपमा सरोकारवालाहरुको ध्यानकर्षण पनि गराउदै आएको छ । कोरोना संक्रमणको चेन ब्रेकका लागि लकडाउन बाहेकको खास अन्य विकल्प नरहेको भनिरहदा पनि दमकमा नाम मात्रैको लकडाउन तथा निषेधाज्ञा रहेको छ । यसको पालना गराउन स्थानीय सरकार र स्थानीय प्रशासनले सकेको छैन ।
तस्विर-कोभिड उपचार केन्द्र दमककी फोकल पर्सन देबी दंगालको फेसबुकबाट साभार
