काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले पार्टीलाई क्रान्तिकारी बनाउन जस्तासुकै त्याग, कष्ट र बलिदान गर्न तयार रहेको बताएका छन् ।कमलादीस्थित प्रज्ञाभवनमा जारी ८औं राष्ट्रिय महाधिवेशनको बन्दसत्रमा आफ्नो प्रतिवेदनमाथि उठेका प्रश्नहरुको जवाफ दिँदै प्रचण्डले यस्तो बताएका हुन् । अध्यक्ष दाहालले पार्टीलाई क्रान्तिकारी बनाउने अवसर गुम्न नदिने बताउदै भने, ‘यो पार्टीलाई क्रान्तिकारी बनाउन जस्तासुकै त्याग, कष्ट र बलिदान गर्न तयार छु ।
म यो अन्तिम अवसर गुम्न दिन्न ।’ त्यस्तै कतिपयले प्रचण्ड फेरि झुपडीमा जान सक्ला ? चिल्लो गाडी छोड्न सक्ला ? भनेर प्रश्न गरेको बताउँदै उनले भने, ‘जरुरी पर्दा मलाई गाउँघरमा जान, उनीहरुसँगै बस्न, मजदुरसँग खान, जनतामाझ गएर बस्न कुनै गाह्रो छैन ।’यसका साथै अध्यक्ष दाहालले माओवादीले अहिलेसम्म छलाङ हान्दै आएको र आवश्यक पर्दा आफनै टाउकोमा आगो लगाएर हिँड्न तयार रहेको समेत बताए ।
