नेपाली राष्ट्रिय क्रिकेट टिमको बन्द प्रशिक्षण आजदेखि शुरुहुँदै छ । टिमको नयाँ प्रशिक्षकको रुपमा पुबुदु दशानायके काठमाडौं आइपुगेपछि पहिलो पटक बन्द प्रशिक्षण शुरुहुन लागेको हो ।

त्रिवि क्रिकेट मैदानमा विहान १० बजेपछि शुरुहुने बन्द प्रशिक्षणका लागि नेपाल क्रिकेट संघ क्यानले प्रशिक्षक दशानायकेसँग सल्लाह गरेर ३० जनाको प्रारम्भीक सूची सार्वजनिक गरेको थियोे । प्रशिक्षक नआउँदै क्यान र खेलाडीबीचको सुरु भएको विवादको गुत्थी नसुल्झिएकाले आजको बन्द प्रशिक्षणमा तोकिएको संख्या भन्दा थोरै खेलाडीहरु उपस्थित हुने सम्भावना रहेको छ ।

क्यानले तत्कालिन कप्तान ज्ञानेन्द्र मल्ल, उप कप्तान दीपेन्द्रसिंह ऐरी, सोमपाल कामी र कमलसिंह ऐरीलाई अनुशासनको कारबाही गरेको थियो । मल्ल र ऐरीको क्रमस कप्तान र उपकप्तान पद खोसेको छ भने चारै जना खेलाडीलाई सन् २०२२ को केन्द्रीय सम्झौतामा शुरुको ६ महिना अर्थात जुनसम्म सहभागी नगराउने निर्णय बोर्ड बैठकबाटै गरेको छ ।

कारबाही गरेपछि मुख्य प्रशिक्षक दशानायकेले चारै खेलाडीलाई समेटेर ३० जनाको प्रारम्भिक सूची क्यान मार्फत सार्वजनिक गराएका थिए । चार जना खेलाडीलाई कारबाही गरिए पनि खेल्न भने क्यानले कुनै प्रतिवन्ध लगाएको छैन् । नयाँ कप्तानको रुपमा क्यानले सन्दीप लामिछानेलाई नियुक्त गरिसकेको छ ।

तर, चार जना खेलाडीलाई गरिएको कारबाही प्रकरणका कारण अहिले खेलाडीहरु गुटमा विभक्त भएका छन् । जसका कारण मल्ल र ऐरी पक्षका केही खेलाडीहरु क्यानले शनिबारका लागि रिर्पोटिङ गर्न दिएको समयमा सम्पर्क नगर्ने खेलाडीको संख्या १४ पुगेको छ ।

बन्द प्रशिक्षणका लागि रिपोर्टिङ नगर्ने १४ खेलाडीहरु :

ज्ञानेन्द्र मल्ल

दीपेन्द्रसिंह ऐरी

सोमपाल कामी

कमलसिंह ऐरी

विनोद भण्डारी

रोहित कुमार पौडेल

कुशल भुर्तेल

बिक्रम शोब

करण केसी

सुशन भारी

सन्दीप जोरा

नन्दन यादव

अविनाश बोहोरा

कुशल मल्ल