काठमाडौं– नेपाली कम्युनिष्ट पार्टी (नेकपा) ले आगामी फागुन २१ मा हुने प्रतिनिधिसभा सदस्य निर्वाचनमा झापा– ५ बाट युवा नेता रञ्जित तामाङलाई उम्मेदवार बनाउने भएको छ ।
नेकपाका संयोजक पुष्पकमल दाहाल प्रचण्डले शनिबार ललितपुरको हात्तीवनस्थित निवासमा बोलाएर तामाङलाई टिकट दिएका हुन् ।
निर्वाचन आयोगले तय गरेको कार्यतालिका अनुसार आगामी ६ माघमा उम्मेदवारको मनोनयन दर्ता हुनेछ । तामाङले झापा–५ को टिकट आफूले पाएको बताए ।
संयोजक प्रचण्डले जितको शुभकामनासहित आफूलाई टिकट प्रदान गरेको उनले जानकारी दिए ।
‘प्रचण्ड कमरेडले झापा–५ को टिकट दिनुभयो’, तामाङले भने, ‘जितको अग्रिम शुभकामनासहित जसरी पनि जित्नुपर्छ भन्नुभएको छ ।’
माओवादी सम्वद्ध विद्यार्थी सङ्गठन अखिल क्रान्तिकारीका पूर्वअध्यक्ष तामाङ प्रखर वक्ताका रुपमा चिनिन्छन् । उनी युवाहरु माझ लोकप्रिय पनि छन् ।
झापा–५ एमाले अध्यक्ष केपी ओलीको परम्परागत निर्वाचन क्षेत्र हो । उक्त क्षेत्रबाट ओली ०४८ सालदेखि लगातार चुनाव लड्दै आएका छन् ।
यसपटक काठमाडौं महानगरपालिकाका मेयर बालेन्द्र साह (बालेन) पनि झापा–५ बाट उठ्ने तयारीमा छन् । त्यसका लागि उनले दमकमा तीनवटा घर भाडामा लिएका छन् ।
