रुपन्देही । रुपन्देहीमा प्रेम सम्बन्धबारे भएको झडपमा ११ जना घाईते भएका छन् । त्यस्तै घाईतेमध्ये २ जनाको अवस्था भने गम्भीर रहेको छ । प्रेम सम्बन्धबारेचुक्ली लगाएको भन्दै दुई छिमेकी परिवारबीच झडप भएको हो । घाइतेको युनिभर्सल मेडिकल कलेज भैरहवा र भीम अस्पतालमा उपचार भइरहेको छ । घटनामा संलग्न रहेको आरोपमा प्रहरीले २ जनालाई पक्राउ गरेको छ । उनीहरु मनौवर अलि शेख र उनका छोरा हुन् । प्रहरीका अनुसार बुधबार साँझ रुपन्देहीको रोहिणी गाउँपालिका ६ विशुनपुराका मनौवर अलि शेख र छोटु यादव परिवारबीच भनाभन सुरु भएको थियो । छोटु यादवकी पत्नीले मनौरका छोरा उमरको प्रेम प्रसंगबारे गाउँमा किन बताएको भन्नेबारेबाट झगडा सुरु भएको थियो । झगडा बढ्दै जाँदा शेष परिवारले भालासहित आक्रमण गरेको थियो । यसपछि छिमेकी छुट्याउन पुगेका थिए । छुट्याउन गएका छिमेकी समेत घाइते भएका छन् । शेष परिवारका ३ र यादव परिवारतर्फबाट ८ जना घाइते भएको प्रहरी चौकी पिप्रहवाका प्रमुख सइ राजुबाबु बानियाँले बताए । उनीहरु महिम यादव, छोटु यादव, ताना यादव, रीमा यादव, शेषमान यादव, सुशीला यादव, छोटेलाल यादव, अमेरिका यादव, महिम उमर शेष मोहमद इशुक र अर्विन निशा हुन् । प्रहरीका अनुसार उपचारमा पठाइएबाहेकका पनि घाइते रहेको छन् । ‘साँझ ७ बजेतिरबाट झगडा सुरु भएको रहेछ ।’असइ बानियाँले भने ‘पौने ९ मा हामी पुग्दा मान्छेहरु रगताम्य भएर ढलेका थिए।’