काठमाडौं, ८ असोज– एमाले केन्द्रीय सदस्यहरुले वर्तमान सत्ता गठबन्धनले एमालेलाई सिध्याउन विदेशीको योजना अनुरुप ‘खण्डे चुनाव’ नीति लिएर घेराबन्दी गरेको भन्दै पार्टी नेतृत्वलाई सचेत गराएका छन् । पार्टी केन्द्रीय कार्यालयमा चालु केन्द्रीय कमिटीको बैठकको समुह छलफलमा बोल्दै केन्द्रीय सदस्यहरुले एमालेलाई घेराबन्दीमा पार्न नै अन्य प्रदेशको चुनाव सकी २ नम्बर प्रदेशको स्थानीय चुनाव ६ महिनापछि सारिएको घटनाबाट सिक्न सुझाव दिएका हुन् ।
‘सिंगो देशमा एकै पटक चुनाव भएको भए एमाले विरुद्ध २ नम्बर प्रदेशमा कांग्रेस माओवादीले भ्रम छर्दा अन्य प्रदेशमा उनीहरुलाई नोक्सान हुन्थ्यो, त्यसैका लागि देखिने र नदेखिने शक्ति मिलेर प्रदेश २ को चुनाव सारिएको थियो’ बैठकमा नेताहरुले भने, ‘बाह्य शक्तिले एमालेलाई घेराबन्दीमा पार्नपर्छ जित्न दिनु हुँदैन, त्यसका लागि कांग्रेस–माओवादी गठबन्धन बलियो बनाउनु पर्छ भनेर योजना बनाइरहेको तथ्य बाहिर निस्केको छ । निर्वाचन आयोगले स्वतन्त्र भूमिका निर्वाह गर्न सकेको छैन, यस्तो बेला नेतृत्व गम्भीर हुनुपर्छ ।’
बैठकमा बोल्ने अधिकांश केन्द्रीय सदस्यहरुले पार्टी अध्यक्ष केपी शर्मा ओलीलाई चुनावपछि बन्ने सरकारको प्रधानमन्त्रीमा उम्मेदवार घोषणा गरी मतदातासमक्ष मत माग्न जानु पर्ने वताएका थिए । ‘पार्टी अध्यक्षलाई प्रधानमन्त्रीको उम्मेदवारका रुपमा अगाडि सारेर मतदातासमक्ष जानुपर्छ, राष्ट्रिय स्वाधीनता, समृद्धि, लोकतान्त्रिक आचरण र सुशासनको विषयमा पार्टीले अगाडि सारेका मान्यतालाई अनुमोदन गराउनुपर्छ’ बैठकमा धारणा राख्दै केन्द्रीय सदस्यहरुले भनेका छन् ।
कांग्रेस–माओवादी गठबन्धन राष्ट्रको हित विरोधी, सुशासन विरोधी र लोकतान्त्रिक आचरणलाई भत्काउन उद्यत रहेको वताउँदै यो कायम रहे मुलुकले दुःख झेल्न वाध्य हुनु पर्ने नेताहरुले औंल्याएका छन् । भारतीय पक्षले कांग्रेस–माओवादीको दीर्घकालीन गठबन्धन बनाएर नेपालको राजनीतिमा आफ्नो अभिष्ट पूरा गरिने खुलेआम घोषणा गरिरहेका बेला एमाले नेताहरुले हानीकारक उद्धेश्यको गठबन्धन भत्काउनु पर्ने राय प्रस्तुत गरेका हुन् ।
शुक्रवार सुरु भएको बैठकमा अध्यक्ष केपी शर्मा ओलीले प्रस्तुत गर्नुभएको राजनीतिक प्रतिवेदनमाथि ७ प्रदेश र एक गैरभौगोलिक प्रदेश गरी ८ समूहमा छलफल भइरहेको छ । सबैजसो समुहमा बोल्ने सदस्यहरुले राष्ट्रलाई सही मार्गमा ल्याउन बाह्य शक्तिद्वारा निर्मित गठबन्धनलाई पराजित गर्नु पर्ने राय प्रस्तुत गरेका हुन् । समूहगत छलफलपछि प्रदेश नम्बर १ बाट शिवमाया तुम्बाहाम्फे, २ बाट सत्यनारायण मण्डल, ३ बाट कांशीनाथ अधिकारी, ४ बाट गणेश तिमल्सिना, ५ बाट दलबहादुर राना मगर, ६ बाट यमलाल कँडेल, ७ बाट भीम रावल र गैरभौगोलिक क्षेत्रबाट महेन्द्रबहादुर पाण्डेले समुह निश्कर्ष प्रस्तुत गर्नुभएको छ ।
