काठमाडौं। मंसिरमा हुने प्रदेश र प्रतिनिधिसभा निर्वाचनको लागि विभिन्न पार्टीका स्थानिय पार्टी समितिहरुले सम्वन्धित जिल्लाबाट लोकतन्त्रवादी पत्रकारहरूको नाम पनि सिफारिस गरेको छ । केही पत्रकार प्रतिनिधिसभातर्फ प्रत्यक्षका लागि सिफारिस भएका छन् भने केही प्रादेशिक निर्वाचनका लागि सिफारिसमा परेका छन् ।
नेपाली काँग्नेस, एमाले, माओवादीले पत्रकारहरुलाई पनि संसद चुनावका लागि सिफारिस गरेको छ । नेपाली काँग्रेस निकट नेपाल प्रेस युनियनका संस्थापक शोभाकर पराजुली काँग्रेसका तर्फबाट बाराबाट संसद सदस्यका लागि सिफारिस भएका छन्। प्रेस युनियनकै संस्थापक तथा नेपाल पत्रकार महासंघका पूर्व अध्यक्ष तारानाथ दाहाल सिन्धुपाल्चोक २ बाट काँग्रेसको सिफारिसमा परेका छन्। नेपाल प्रेस युनियनका ४ जना केन्द्रिय उपाध्यक्षहरु सिफारिसमा परेका छन्। उपाध्यक्ष इश्वरी ओझाको नाम काभ्रेको क्षेत्र नं १ को प्रादेशिक निर्वाचन क्षेत्रबाट सिफारिस भएको छ।
त्यस्तै उपाध्यक्ष विजयी सन्तोषी राईको धनकुटाबाट सिफारिस भएको छ भने उपाध्यक्ष वालाकुमारी अधिकारीको ओखलढुङगाबाट सिफारिस भएको छ। अर्का उपाध्यक्ष रमेश पौडेलको पर्वतबाट सिफारिस भएको छ।
त्यस्तै, घटना र विचार साप्ताहिकका सम्पादक देवप्रकाश त्रिपाठीको धार्दिङ काँग्रेसले प्रतिनिधि सभाको प्रत्यक्षतर्फ सिफारिस गरेको छ। धार्दिङबाट पत्रकार ऋषि धमलाको नाम पनि सिफारिस भएको छ । त्यस्तै देशान्तर साप्ताहिकका प्रधानसम्पादक कविर राणा प्रतिनिधिसभातर्फ भक्तपुर २ बाट सिफारिस भएका छन् । पाँचथरबाट पत्रकार महासंघ पाँचथरका सभापति लवदेव ढुँगाना र विपेन्द्र गौतम सिफारिस भएका छन् । उनीहरुलाई काँग्रेसले सिफारिस गरेको हो।
पत्रकार महासंघका पूर्व महासचिवव पोषण केसी बाँकेबाट काँग्रेस सिफारिसमा परेका छन्। नवलपरासीबाट प्रेस युनियनका सचिव केवी राना र लेखक तथा पत्रकार शंकर तिवारी काँग्रेस सिफारिसमा परेका छन्। पाल्पाबाट प्रेस युनियनका नेता जगदिश भट्टराई पनि काँग्रेस सिफारिसमा परेका छन्। प्रेस चौतारीका अध्यक्ष गणेश बस्नेत दोलखाबाट एमालेको सिफारिसमा परेका छन्।
