महागुरु तथा राष्ट्रिय बिभूति फाल्गुनन्द लिङदेनले समाजसुधारका लागि खेलेको भूमिकाको कदर गर्दै दमक नगरपालिकाले कार्तिक २५ गते फाल्गुनन्द जयन्तीको दिन नगरपालिका भित्र सार्वजनिक बिदा दिने निर्णय गरेको छ । दूइ बर्ष अघि कार्तिक २५ गते किरातीहरुलाइ सार्वजनिक बिदा दिने सरकारले निर्णय गरेको थियो ।
सरकारले किरातीहरुलाइमात्र सार्वजनिक बिदा दिने निर्णय गरेकोमा दमक नगरपालिकाले सो दिन नगरपालिकाभित्र सार्वजनिक बिदा दिने निर्णय गरेको हो । सो दिन दमकका सबै सरकार कार्यालय तथा बिद्यालयहरु बन्द हुनेछन् । दमक नगरपालिकाका प्रमुख रोमनाथ ओलीले बिशेष प्रस्तावको रुपमा यसलाइ ल्याएपछि सर्वसम्मत रुपमा पास भएको थियो ।
जन्म : वि.सं. १९४२ कात्तिक २५ गते आइतबार (इलाम जिल्ला, इभाङ गाविस, चुक्चिनाम्बा।
नाम : नरधोज, फलामसिं र फाल्गुनन्द।
उपनाम : ध्यानी, तपस्वी, सत्यहाङमा, महागुरु, मुहिङगुम अङसीमाङ।
ज्ञान प्राप्त : ८ वर्षको उमेरमा (जितपुर ८, खत्रक्पा खोल्सी, माईखोला किनार)
जीवनशैली : आजीवन ब्रम्हचारी, महिलाको भेषभूषा र गहनामा सज्जित, कम बोल्ने, मसिनो स्वर, शाकाहारी भोजन, हिँडीरहने, सादा जीवन।
देहत्याग : वि.सं. २००५ चैत २२ गते सोमबार (हाङयक, पान्थर)
सतगत र समाधिस्थल : सिलौटी, पान्थर।
मुहिङगुम अङसीमाङ फाल्गुनन्द लिङ्देनका प्रमुख कार्यहरु
- सिन्चेई फक्ताङलुङ (कुम्भकर्ण हिमश्रृंखला) लाई किरात धर्मावलम्बीहरुको तीर्थभूमि र मुक्तिभूमिको रुपमा ढोका खुला,
- वि.सं. १९८८ बैसाक २४ गते १० लिम्बुवान १७ थुमका किरातीहरुलाई बोलाई वृहत चुम्लुङ गरि तत्कालीन समाजका विकृतिलाई हटाउन सत्यधर्म मुचुल्का खडा,
- छरपष्टिएको साम्जीक मुन्धुमलाई संहिताकरण,
- लोप हुने अवस्थामा भएको किरात लिपिको प्रचार प्रसार,
- विभिन्न स्थानमा माङहिमहरुको स्थापना,
- पहिरो रोक्ने, पानी उमार्ने, खडेरी भएको ठाउँमा पानी पार्नेजस्ता चामत्कारिक कार्यहरु।
मुहिङगुम अङसीमाङ फाल्गुनन्द लिङ्देनप्रति सरकारले गरेको सम्मान
- महागुरु फाल्गुनन्दको नाममा रु. १५/– को हुलाक टिकट,
- महागुरु फाल्गुनन्दको नाममा नेपाली पाठ्यक्रममा संक्षिप्त जीवनी,
- दमकदेखि माङसेबुङ, रवीहुँदै रााके जोड्ने सडकलाई फाल्गुनन्द मार्ग नामाकरण,
- महागुरु फाल्गुनन्दको नाममा राष्ट्रिय विभूति घोषणा,
- महागुरु फाल्गुनन्द जयन्तीको नाममा सार्वजनिक बिदा।
अलङ्कार, आभूषण, विशेषण
- छरपष्टिएको अनि दिशाविहिन भएको किरात धर्म दर्शनलाई मार्गदर्शन गर्नु भएका कारण वहाँ किरात धर्म दर्शनदाता।
- तत्कालिन समाजमा व्याप्त विकृतिलाई हटाउन सत्यधर्म मुचुल्का खडा गरी त्यसलाई पालन गर्न गराउन पहल गर्नु भएकोले महान् समाज सुधारक।
- जनसांख्यिक तथ्याङ्क अनुसार मुलुकको चौथो धर्मको सबैभन्दा पूज्य व्यक्ति, वहाँले प्रतिपादन गर्नुभएको सिद्धान्त एवं वहाँले व्यक्तिगत स्वार्थभन्दा माथि उठेर जीवनभर गर्नुभएको कार्यका कारण सरकारले दिएको राष्ट्रिय सम्मान हो, राष्ट्रिय विभूति।
- किरात धार्मिक इतिहासमा विभिन्न देवअवतारी व्यक्तिहरुको जन्म भइरहन्छ, सोही क्रममा वहाँ अवतरित हुनु भएकोले मुन्धुमी भाषामा मुहिङगुम अङसीमाङ।
