ढल्केबर मुजफ्फर आयोजनाको सवस्टेशन निर्माणको ठेक्का सम्झौता तोडिएसँगै सुख्खा मौसमका लागि योजनामा राखिएको विद्युत घट्ने पक्का भएपछि प्राधिकरणसामु चुनौती खडा भएको हो । तर जसरी पनि लोडसेडिङको समस्या हल गर्न कुलमान घिसिङ र उनको टोली लागिपरेको छ । भारतबाट आयात गरिएको विद्युतमा फेरि थप गरेरै भए पनि टोली लोडसेडिङ हुन नदिने अभियानमा लागेको छ ।
सुख्खा मौसममा विद्युत आपूर्तिमा समस्या आउने देखिएरै कुलमानको टोलीले यसअघि एलइडि बल्ब खरिद गरी नेपाली बजारमा बाँड्ने प्रक्रिया अगाडि बढाएको थियो । तर सो प्रक्रिया विवादमा आएपछि स्थागित गरिएको छ । लोडसेडिङ अन्त्य गर्ने अभियानमा देखिएको यो विवाद नै सुख्खा मौसममा प्राधिकरणको योजनाको ठूलो चूनौती रहेको प्रवक्ता प्रबल अधिकारी बताउँछन् ।
यस वर्षको सुख्खा मौसममा भारतबाट थप बिजुली आयात गरेर भए पनि लोडसेडिङ हुने नदिने महाअभयिानमा लागेको, निर्देशक कुलमान घिसिङ, प्रवक्ता प्रवल अधिकारी सहितको टोली शुक्रबार नयाँ दिल्ली प्रस्थान गरेको छ । चिनियाँ ठेकेदारको बदमासीका कारण आगामी हिउँदमा ढल्केबर मुजफ्फर सवस्टेशनबाट थप विद्युत् आयात हुन नसकेपछि टनकपुर मार्गलाई वैकल्पिक स्रोतको रुपमा प्रयोग गर्न लागिएको हो ।
प्राधिकरणको कार्य तालिकाअनुसार यसै महिना ढल्केबर सवस्टेशनको काम सम्पन्न हुने थियो । ढल्केबर– मुजफ्फरपुर अन्तरदेशीय प्रसारण लाइनलाई २ सय २० केभीमा चार्ज गरेर सोही प्रसारण लाइन मार्फत २ सय मेगावाट विद्युत् आयात गर्ने तयारीमा प्राधिकरण तालिकामा धक्का लागेपछि भारतसँग गुहार गर्नुपरेको अधिकारीहरु बताउँछन् ।
प्राधिकरणकाअनुसार टनकपुर नाकाबाट थप ४० मेगावाट विद्युत् आयातको विषयमा नयाँ दिल्लीमा रहँदा छलफल हुने कार्यसूची रहेको छ । प्राधिकरणले टनकपुरमा १०० एमभीएको ट्रान्सफर्मर राखेर थप ४० मेगावाट विद्युत् आयात गर्ने तयारी गरेको छ ।
टनकपुरमा रहेको प्राधिकरणको सवस्टेशनको स्तारोन्नती गरेर ८० मेगावाट विद्युत् आयात गर्ने सोचमा प्राधिकरण छ । नेपाल भारत ऊर्जा सचिवस्तरीय संयुक्त समितिको बैठकले समेत सो स्थानबाट विद्युत् आयात गर्न सैद्धान्तिक सहमति दिएको प्राधिकरणले जनाएको छ ।
ढल्केबर मुजफ्फपुर प्रसारण लाइनको सवस्टेशन निर्माणको ठेक्का सम्झौता तोडिएपनि प्राधिकरणले वार्षिक १ अर्ब रकम प्रसारण शुल्कवापत तिर्नुपर्नेछ । हाल सो प्रसारण लाइनबाट १४५ मेगावाट विद्युत् आयात भइरहेको छ । प्राधिकरणले यसअघि सो लाइनको सवस्टेशन निर्माण भएपछि भारतबाट आयात हुने थप बिद्युत सो मार्गबाट ल्याउने योजना बनाएको थियो ।
