कांग्रेसका वरिष्ठ नेता रामचन्द्र पौडेलले वाम गठबन्धनले कांग्रेसलाई पनि एकजुट भएर लाग्नु पर्ने प्रेरणा मिलेको बताएका छन् । बागलुङ क्षेत्र नं. २ को गलकोटमा आयोजित बृहत चुनावी सभालाई सम्बोधन गर्ने क्रममा उनले यस्तो कुरा बताएका हुन् ।
नेता पौडेलले भने, ‘वाम गठबन्धनले हामी कति पनि आत्तिएका छैनौं, बरु उल्टै वाम एकजुट हुँदा हामीलाई पनि एकजुट भएर लाग्नुपर्ने प्रेरणा मिलेको छ ।’ उनले मुलुकमा वामपन्थी दलहरुले लोकतन्त्रको सम्मान गर्न नसक्दा देश धराशायी बन्दै गएको आरोप लगाए ।
लोकतन्त्रको रक्षा र संविधान कार्यान्वयनको जिम्मा कांग्रेसको काँधमा आएको भन्दै नेता पौडेलले लोकतन्त्र संस्थागत गर्न कांग्रेसले मात्रै सक्ने दावी गरे । नेता पौडेलले आसन्न निर्वाचनमा देशलाई आर्थिक समृद्धिको बाटोमा लैजान सम्पू्र्ण जनताले कांग्रेसको पक्षमा मतदान गर्ने विश्वास रहेको बताए ।
देशको सबै वर्गलाई सम्मान दिने खालको संविधान कांग्रेसको नेतृत्वमा निर्माण भएको बताउँदै उनलेले त्यसको कार्यान्वयन पनि कांग्रेसले नै गर्ने बताए । पौडेलले भने, ‘हामी देशका सबै डाँडा पाखामा समृद्धिको दियो बाल्ने उद्देश्य बोकेका छौं । वाम पन्थीहरु सत्ता मोहमा फस्न लागेका छन् ।’
