सुत्केरी भएको एक घण्टामै दिइन् एसईई परीक्षा

मंगलबार म्याग्दीको एक परीक्षा केन्द्रमा एक घण्टाकी सुत्केरीले माध्यामिक शिक्षा परीक्षा (एसईई) दिएकी छन्। २१ वर्षीय फुलमायाँ केसी बिहानैबाट सुत्केरी व्यथा लागेपछि ताकम स्वास्थ्य चौकी पुगेकी केसीले ७ बजे स्वास्थ्य चौकीमै छोरी जन्माएकी थिइन्।

केसीले परीक्षा दिन सक्ने जनाएपछि परिवार, स्वास्थ्यकर्मी र स्थानीयको सहयोगमा स्ट्रेचरमा राखेर ८ बजे नै हेम मावि सिवाङ परीक्षा केन्द्रमा पुर्‍याइएको थियो।

आमा र बच्चा दुवैको अवस्था सामान्य रहेपछि स्वास्थ्यकर्मीले सुत्केरी विद्यार्थी केसीलाई परीक्षामा सहभागि हुन अनुमति दिएको थियो। एसईई चलेकै बेला जन्मिएकी केसीकी छोरीको नाम प्रवेशिका राखिएको छ। उनको तौल ३ केजी छ ।