प्रहरीले लागुऔषध ओसारपसारमा कडाइ गरेपछि यसमा संलग्नहरुले नयाँनयाँ उपाय अवलम्बन गर्ने गरेको पाईएको छ । युवायुवतीहरुले गोप्य अंगमा लुकाएर ल्याउने देखि लिएर हातखुट्टा भाचिएको भन्दै ‘व्यान्डेज’ बाँधेर त्यो भित्र हालेर ल्याउनेसम्मका उपाय अपनाउने गरेको बताइन्छ ।
यस्तै एक युवतीले आफ्नो मुखमा नै हालेर ब्राउन सुगर हालेर ल्याउदै गरेको अवस्थामा प्रहरीले पक्राउ गरेको छ । मुखमा राखेर पनि व्राउनसुगरको ओसारपसार गरिएको प्रहरीले पहिलो चोटी पाएको प्रहरीको भनाइ रहेको छ । लागु औषध भित्र्याउने यो अनौठो र नयाँ तरिकाको बिषयमा यसभन्दा अगाडि प्रहरीले आँकलन गरेको थिएन ।
पूर्वी नाका मेचीनगर नगरपालिका–६ हिकोला मोडबाट प्रहरीले मुख भित्र लुकाएर ल्याउदै गरेको ब्राउन सुगरसहित शिवशताक्षी नगरपालिका–११ की २७ वर्षीया एक युवती पक्राउ गरिएको बताएपनि नाम सार्वजनिक गरिएको छैन । इलाका प्रहरी कार्यालय काकडभिट्टा श्रोतका अनुसार पेसेवर लागुऔषध ओसारपसारकर्ता भएको हुनसक्ने भएकाले अनुसन्धान जारी रहेको छ ।
ति युवतीलाइ १ ग्राम २ सय मिली ग्राम लागु औषध ब्राउन सुगरसहित पक्राउ गरिएको हो । लागूऔषध नियन्त्रण व्युरो काँकडभिट्टाबाट खटिएको प्रहरीको टोलीले पक्राउ गरेर इलाका प्रहरी कार्यालय काकडभिट्टा बुझाएको हो । पछिल्लो समय सिमामा युवाहरुलाइ बढि शंका हुनेभएपछि युवतीहरु लागुऔषध ओसारपसारमा सक्रिय रहेको पनि प्रहरीको अनुमान रहेको छ ।
यसभन्दा अगाडि झापाको दमकबाट बिहिबार लागु औषध कारोबारी एक युवा ९ ग्राम ब्राउन सुगर सहित पक्राउ परेका थिए । पक्राउ परेका दमक ७ हाटखोलाका ध्रुव कुमाललाइ प्रहरीले मुद्धा चलाएको इलाका प्रहरी कार्यालय दमकका प्रमुख दीपक गिरीले बताउनु भएको छ ।
