गंगामायाको अनसन स्थगित

छोराको हत्यारालाई कानुनी कारबाहीको माग गर्दै बीर अस्पतालमा अनसनरत गंगामाया अधिकारीले अनसन स्थगित गरेकी छिन् । शुक्रवार कानुनमन्त्री शेर बहादुर तामाङ र मानवअधिकारकर्मीको रोहबरमा उनी अनसन स्थगित गर्न सहमत भएकी हुन् । उनका माग पुरा गर्न सरकार प्रतिवद्द रहेको बताएपछि १० दिनका लागि अनसन तोडुने सहमति भएको हो । १० दिन भित्र आफ्ना माग पुरा नभए पुनःअनसन बस्ने उनले बताएकी छिन् । छोराको हत्यारालाई कारबाहीको माग गर्दै गत जेठ १५ देखि उनी वीर अस्पतालमा आमरण अनशनरत थिइन् । गंगामायाका छोरा कृष्णप्रसाद अधिकारीको हत्याका अभियुक्त भनिएका गोरखा फुजेलका छविलाल पौडेलले गत आइतवार आत्मसर्मपण गरेका थिए । उनलाई आइतबार नै डिल्लीबजार सदरखोरमा पठाइएको हो। ०६१ जेठ २४ गते उनका छोराको हत्या भएको थियो । छोराका हत्यारालाई कारवाहीको माग गर्दै अनशन बसेका पिता नन्दप्रसादको अनशनरत अवस्थामै मृत्यु भइसकेको छ । नन्दप्रसादको शव अहिलेसम्म शिक्षण अस्पतालमै छ ।