काठमाडौँ । नेकपा सरकारले बजेटमा छुटेका विषयलाई समेट्ने गरी पुरक बजेट ल्याउने विषयले नेकपाभित्रको छलफलमा प्रवेश पाएको छ ।
नेकपाकै एक नेताले राजनीतिक तहमा पार्टीभित्रै पुरक बजेटको आवश्यकता औँल्याएको बताए । उनले अहिले नेकपा विशेष गरी बृद्धभत्ता बढाउन नसक्दा आलोचित भएको भन्दै पार्टीभित्र पुरक बजेटको कुरा उठेको उल्लेख गरे ।
पाँचहजार बृद्धभत्ता पुर्याइदिन्छु भन्दै जेष्ठ नागरीकहरुको सेन्टिमेन्टमा खेलेर चुनाव जितेको आरोप वर्तामान सरकारलाई छ । नेकपाका एक नेताले आफुहरुको घोषणापत्रमा भएको कतिपय बाचा बजेटले सम्बोधन गर्न नसकेपछि सर्वत्र त्यही विषयलाई लिएर आलोचित हुनुपरेको भन्दै पुरक बजेटको आवश्यकताको विषयमा चर्चा भएको ती नेताले भने । पुरक बजेट कहिले ल्याउने, कसरी ल्याउने विषय परिपक्क भने नभइसकेको ती नेताले भने ।
सरकारमा समेत पुरक बजेटबारे छलफल शुरु भएको पुष्टि गर्दै एक मन्त्रीले रातोपाटीसँग भने, ‘पुरक बजेटको विषय पहिला राजनीतिक सहमति जुटाएपछि अगाडि बढछ् । निश्चित समय भनेर तोकिएको छैन अहिलेसम्म ।’
उसो त पुरक बजेटका विषयमा नेकपाकै एक अध्यक्ष प्रचण्डले घुमाउरो भाषामा संकेत गरिसकेका छन् । मंगलबार आफ्नै निवासमा पत्रकार भेला पारेर बृद्धभत्ता बढाउन नसक्दा बुढाबुढी आमाबुबाले सराप्न थालेको भन्दै अब यस विषयलाई कसरी हुन्छ सम्बोधन गर्नुपर्ने बताएका थिए । उनले पुरक बजेट ल्याएर हुन्छ वा अरु कुनै माध्यम हुन्छ त्यसलाई प्रयोग गरेर बृद्धभत्ता थोरै भएपनि बढाउनुपर्ने बताए । उनको अभिव्यक्तिले सरकारले अहिले पुरक बजेटको आवश्यकता महसुस गरिसकेको स्पष्ट हुन्छ ।
उनले बृद्धभत्ता दिँदा आशिर्वाद दिने बुढाबुढीले अहिले जिल्लामा जाँदा आफुहरुलाई सराप्न थालेको देखेर नरमाइले लागेको समेत बताएका थिए । एकैपटक पाँच हजार बढाउन नसकेको भएपनि थोरै बढाइदिएको भए ति बुढाबुढीले आशिर्वाद दिने थिए,’ प्रचण्डले पत्रकारसँग भेटघाट कार्यक्रममा भने ।
दुई तिहाइको सरकार भएपनि जनताको भावना अनुसार काम गर्न नसकेपछि बर्तामान सरकारप्रति जताततै आक्रोश देखिन्छ । पाँच बर्षको लागि जनताले चुनेका नेताहरुप्रतिनै आमजनताको वितृष्णा बढ्न थालेको पार्टी भित्रैकाले स्वीकार्न थालेका छन् ।
प्रचण्डले त सरकारको कामको कमजोरीलाई स्वीकार्दै ठोस पहल अनिवार्य भएको समेत बताउन थालेका छन् ।
