जापानमा जान चाहने नेपालीले पहिलोपटक अनलाइनबाटै जापानी भाषा परीक्षा दिन पाउने भएका छन् । यहाँ काठमाडौंमा आयोजित पत्रकार सम्मेलनमा जापानको प्राक्टिकल जापानिज कम्युनिकेसन (पीजेसी) ब्रिजसँग सहकार्य गरी अनलाइनबाटै भाषा परीक्षा दिन पाउने व्यवस्था गर्न लागिएको जानकारी मोग सर्भिस प्रालिका अध्यक्ष प्रमुख कार्यकारी अधिकृत ओमहरि प्रजापतिले दिए ।
कागजबाट लिखित परीक्षा दिँदा नतिजाका लागि तीन महिना पर्खनुपर्नेमा अनलाइनबाट परीक्षा दिनेबित्तिकै थाहा पाउन सकिन्छ । सोको प्रमाणपत्र १० दिनमा लिने पाइनेछ । परीक्षामा उपयुक्त लब्धांक नआएको एक हप्तापछि अर्को परीक्षा दिन सकिने व्यवस्था छ ।
जापानको न्याय मन्त्रालय र अध्यागमन विभागले मान्यता दिएको पीजेसीले सन् १९७६ देखि नै परीक्षा सञ्चालन गर्दै आएको छ । सोही संस्थासँग मोगले सहकार्य गरी परीक्षा सञ्चालन गर्न लागेको हो । मोगका प्रमुख कार्यकारी अधिकृत प्रजापतिका अनुसार विद्यार्थीबाहेकले पनि भाषा परीक्षा दिने पाउनेछन् । परीक्षा शुल्क रु. तीन हजार पाँच सय लाग्छ । परीक्षा अनलाइनबाट जति बेला पनि दिन सकिन्छ ।
