प्रधानमन्त्री अपमानित भएको भन्दै ४ शीर्ष नेताले शनिबार नेकपाको सचिवालय बैठक बहिस्कार गरेका छन् । दिउँसो ३ बजे बोलाइएको सचिवालय बैठकमा अध्यक्षद्वय समयमा नआएपछि पार्टीको सिस्टममा सुधार ल्याउन भन्दै शीर्ष नेता झलनाथ खनाल, प्रवक्ता नारायण काजी श्रेष्ठ, नेता माधव कुमार नेपाल र बामदेव गौतमले बैठक बहिस्कार गरेका हुन् ।
साढे तीन बजेसम्म पनि प्रधानमन्त्री केपी ओली र अध्यक्ष पुष्पकमल दाहाल प्रचण्ड नआएपछि बैठक छाडेर निस्किएको नेकपा नेता झलनाथ खनालले जानकारी दिए । ‘१५ मिनेटसम्म कुर्ने भन्ने थियो, तर आधा घण्टासम्म पनि दुबै जना नआएपछि निस्किएका हौं,’ खनालले भने, ‘पार्टीभित्र हुर्किएको बेथितीविरुद्ध आवाज उठाउन बैठक छाडेर निस्कियौँ ।’
अध्यक्षद्वय कतिबेला आइपुग्ने भन्ने बारे कुनै जानकारी नआएपछि पार्टीलाई व्यवस्थित गर्न बैठकबाट निस्केको प्रवक्ता नारायण काजी श्रेष्ठले जानकारी दिए । ‘वैठक कक्षबाट तीन जना कमरेडहरु पनि बाहिरिनु भयो भन्ने खबर पाए । त्यति बेलासम्म अध्यक्ष र महासचिव कमरेड पनि आउनुभएन’ उनले भने, ‘एकिकृत पार्टी गठन भएपछि पहिलो पटक वैठक बाहिस्कार गरेको जस्तो लाग्छ । यस अघि भएको छैन ।’
