मिलिन्द सोमणकी श्रीमती अंकिता कंवरले श्रीमान् एवं नायकलाई पहिलो पटक भेट्दा आफू प्रेमीको मृत्युको शोकमा डुबिरहेको बताइन् ।

वास्तवमा यो जोडीको फोटो ह्युमन अफ बम्बे नामको इन्स्टाग्राम पेजमा सेयर गरिएको छ । यसमा अंकिताले आफ्नो सम्बन्धको कहानी पनि बताएकी छिन् । उनले उक्त पोष्टमा मिलिन्दलाई बारम्बार भेट्दा पनि आफू अतितबाट बाहिर निस्कन नसकेको र नयाँ सुरुवातका लागि ठूलो समस्याको सामना गर्नुपरेको बताइन् । अंकिता (२७) उमेरमा मिलिन्द (५३) भन्दा २६ वर्ष कान्छी छिन् । दुबैले अप्रिल २०१८ मा विवाह गरेका हुन् ।

प्रेमीको अचानक मृत्युका कारण टुटेकी थिइन् अंकिताः

अंकिता भन्छिन्, ‘मैले देश बाहिर गएर मलेशियामा क्याबिन क्रुको काम गर्ने निर्णय गरेकी थिएँ । यो त्यही समय थियो जब मेरो प्रेमीको अचानक मृत्यु भएको थियो । मन नराम्रोसँग टुटेको थियो । म फिर्ता आउन चाहन्नथेँ तर त्यसको केही महिनापछि मेरो पोस्टिङ चेन्नईमा भयो । म आफ्नो साथीसँग होटलमा बसेकी थिएँ । एक दिन मैले होटलको लबीमा अग्ला व्यक्तिलाई देखेँ । उनी मिलिन्द सोमण थिए । म उनको निकै ठूलो प्रशंसक थिएँ । त्यसकारण मैले उनलाई हेलो भने तर उनी निकै व्यस्त थिए ।’

‘केही दिनपछि होटलको नाइटक्लबमा मेरो उनीसँग भेट भयो । मैले उनलाई हेरिरहेको थिएँ र उनले पनि मलाई घुरिरहेका थिए । मेरा साथीहरुले मलाई उनीसँग कुरा गर्न उक्साए । त्यसकारण म उनी भएठाउँ गएँ र उनलाई डान्स गर्नका लागि सोधेँ । उनी सहर्ष तयार भए । त्यो एक प्रकारको आकर्षण थियो, म त्यो महसुस गर्न सक्थेँ ।’

अंकितालाई याद थिएन आफ्नो मोबाइल नम्बरः

अंकिता थप्छिन्, ‘म यो सबै कुरामा संलग्न हुन चाहन्नथेँ । त्यसकारण आफैंलाई सम्झाएँ र उनले पनि बिर्सिए होलान् भनेर मन बुझाएँ । तर उनले छुट्टिने बेला मेरो नम्बर मागे । त्यतिबेला मैले नयाँ नम्बर लिएको थिएँ जुन मलाई याद थिएन । न त मसँग फोन नै थियो । त्यसकारण उनले आफ्नो नम्बर मेरा साथीलाई दिँदै मलाई मेसेज गर्न अह्राए ।’

… र अंकितालाई लाग्यो कि मिलिन्द उनकै लागि बनेका हुन्

अंकिता थप्छिन्, ‘केही दिन बितिसकेको थियो तर मैले उनलाई दिमागबाट निकाल्न सकिरहेको थिइनँ । त्यसपछि मैले उनलाई मेसेज गरेँ र त्यसको एक हप्तापछि हामी डिनरका लागि भेट्यौं । त्यसपछि हाम्रो मेसेज र भेटले निरन्तरता पायो । तरपनि मैले आफूलाई पूर्ण रुपमा उक्त सम्बन्धलाई समावेश गर्न सकिरहेको थिइनँ । एक दिन मैले उनलाई आफ्नो अतितका कारण मेरा प्रेमी आफ्नो एक हिस्सासँग जोडिएको बताएँ । यसमा उनले भने, ‘जब मैले तिमीलाई मन पराएको थिएँ, तब तिम्रो हरेक चीजसँग प्रेम भयो । त्यो हिस्सासँग पनि, जसले तिम्रो अतितलाई भारी बनाइरहेको छ । त्यसकारण नडराउ । हामी सँगै छौं ।’ त्यसपछि मलाई लाग्यो कि उनी नै ती व्यक्ति हुन् जो मेरै लागि बनेका छन् ।’