नेपाल समूहका अध्यक्ष माधवकुमार नेपालले प्रधानमन्त्री केपी शर्मा ओलीलाई पार्टीको साधारण सदस्यबाट पनि निष्कासित गर्ने तयारी भइरहेको बताएका छन् ।संसद विघटनविरुद्ध सुर्खेतमा आयोजित विरोध सभालाई सम्बोधन गर्दै अध्यक्ष नेपालले ओलीलाई पार्टीबाट हटाउने अन्तिम तयारी भइरहेको बताए ।‘केपी ओलीमा कम्युनिस्टमा हुनुपर्ने कुनै गुण छैन । केपी ओली कमिटीभन्दा माथि होइन, पार्टीभन्दा माथि होइन,’ उनले भने, ‘पार्टीमा हाम्रो बहुमत छ, केन्द्रीय कमिटीका तीन सय जना बढी हो कि एक सय बढी ?’प्रधानमन्त्री ओलीले पार्टीको बहुमतलाई नमानेको बताए । ‘बहुमत नमान्ने मान्छेलाई हामीले के भन्ने ? बहुमत कहिल्यै पनि निर्णयको रूपमा आउँछ । यो संसारभरि गरिएको अभ्यास हो, विश्वभरको तरिका हो,’ उनले भने, ‘यो तरिकालाई केपी ओली नामको तानाशाहले मान्दिनँ भन्दा हामीले उहाँको पछिपछि लाग्नुपर्ने बाध्यता छ ? के हामी केपी ओलीका दास हौं, के हामी हनुमान हौं ? हामीलाई कुनै बाध्यता छैन । यो देशमा तानाशाहलाई कुनै स्थान छैन ।’
