काठमाडौं । ज्योतिषविद्यामा विश्वास गरेका कारण नेपाली कांग्रेसका सभापति शेरबहादुर देउवा प्रधानमन्त्रीमा निर्वाचित भएको एक साताभन्दा बढी भइसक्दा पनि बूढानीलकण्ठस्थित निजी निवास छाडेर बालुवाटारस्थित सरकारी निवासमा सर्न सकेका छैनन् ।
उनी जेठ २३ मा प्रधानमन्त्री निर्वाचित भएका हुन् ।
देउवाको कुण्डलीअनुसार ३ गतेसम्म राहु अष्टम पदमा छ ।
ज्योतिषीले यस्तो बेला नयाँ काम गर्दा विध्नबाधा आउने सुझाएपछि उनी बूढानीलकण्ठमै अड्किएका हुन् ।
वरिष्ठ ज्यातिषी अंगीरस न्यौपानेले देउवालाई असार ३ गतेपछि मात्रै निवास सर्न सुझाएका छन् ।
‘उहाँलाई बालुवाटार सर्न जेठ २७ गते शुभ मुहूर्त थियो, अब असार ४ वा ५ गते मात्रै शुभ मुहूर्त छ,’ न्यौपानेले भने, ‘४ दिन बिहान, दिउँसो र बेलुका शुभ साइत देखिन्छ ।’ (नागरिक दैनिक)
