दाङ, १४ असार– प्यारालाइसिसले थलिएकी ७६ वर्षीया टुकादेवी रावत दुई घन्टा डोली चढेर मतदान गर्न आइपुगेकी छिन् । चार पटक सरेर बल्ल बल्ल भएको स्थानीय तहको दोस्रो चरणको चुनावमा भोट हाल्ने ईच्छा पूरा गर्न उनले डोलीको सहारा लिएकी हुन् ।
टुकादेवीले परिवार र आफन्तसँग भोट हाल्ने ईच्छा जसरी पनि पूरा गरिदिन आग्रह गरेपछि परिवार र छिमेकीले उनलाई डोलीमा बोकेर दुई घन्टाको बाटो पार गर्दै मतदान केन्द्र ल्याएका हुन् । १४ वर्षदेखि प्यारालाइसिसले थलिएर हलचल समेत गर्न नसक्ने उनी मताधिकार प्रयोग गर्न उत्साही थिइन् । जसरी भोट हाल्न पाउनु पर्ने उनको माग आएपछि छोराहरुले उनलाई डोलीमा बोकेर मतदान केन्द्र ल्याएका थिए ।
उनको घर रहेको मालेगाउँबाट घोराही उपमहानगरपालिका वडा नंबर १ को आधारभूत विद्यालय सिमलतारा मतदान केन्द्रमा उनले मतदान गरिन् । त्यहाँ आइपुग्न दुई घन्टा लाग्छ । आफूलाई बृद्धभत्ता दिने पार्टीका उम्मेदवारलाई भोट हाल्ने ईच्छा लागेकाले डोली चढेर मतदान गर्न आएको उनले मतदानपछि वताइन् । ‘आज खुसी लागेको छ, भोट हाल्ने मेरो ईच्छा पूरा भयो’ मतदान गरिसकेपछि टुकादेवीले भनिन्, ‘हामीजस्ता बृद्धा र अशक्तलाई जसले सेवा गरेको थियो, त्यसैलाई भोट दिएँ ।’
