तपाईंहरु चक्रब्युह फाँडेर बाहिर निस्कनु भएको छ । एमालेलाई जनताले विश्वास गरेकाले एमाले विरुद्धको षडयन्त्र माकुराको जालो जस्तो भएको छ । भैंसी हिंड्दा माकुराको जालो तोडिएजस्तो जनताको दृढ समर्थनको बलले एमाले विरुद्ध उनीहरुले गरेको षडयन्त्रको जालो च्यातिएको छ ।
बैशाख ३१ मा चुनाव भएको भरतपुर महानगरमा एमालेले जितेर पनि अहिलेसम्म परणाम आएन । कञ्चनपुरको पुनर्वासमा एमालेले ५७७ ले अगाडि छ । त्यहाँ किन एमाले अगाडि आयो भन्या छ गणनामा अवरोध गर्या छ । अर्जुनधारामा किन ढिलाई भइरहेको छ ? यहाँ पनि एमाले धेरै भोटले अगाडि त्यसैले त्यहाँ अलमल छ । धरानमा किन ढिलाई भइरहेको छ ? २८८ मतले एमालेका वडाअध्यक्ष र सदस्यहरु जिते । कांग्रेस र माओवादी रुवाबासी गरेर खुट्टा बजारेर बस्या छन् । निर्वाचन अधिकृत फेरि गनौं भन्छन् । २० पल्ट गन न, एमाले जित्छ । जति जे गरे पनि एमाले अगाडि छ, अनि अलमलका लागि कर्मचारी फेरेको छ, छानिएका कार्यकर्ता ल्याएको छ । जति छानेर ल्याए पनि जहाँ जहाँबाट मान्छे झिकाउनु पर्छ झिकाएर मान्छे पठाए पनि २८८ भोटले एमाले अगाडि छ । फेरि खुल्छ फेरि रोकिन्छ । सहमति हुन्छ गन्न थाल्यो, मेरो चित्त बुझेन भन्छ एउटाले ।
अव पहिलो चरणको १ ठाउँमा र दोस्रो चरणको ३ ठाउँमा परिणाम आउन बाँकी छ तर, अलमल छ । पहिलो चरणमा बैशाख ३१ गतेको मतगणना आजसम्म । यसदेशमा सरकार छ, यस देशमा निर्वाचन आयोग छ, यस देशमा अदालत छ । तपाईं हामी हेरौं त, सबैको हालत के छ भने अनुचित गठबन्धनको छायाँमा यसरी परेको छ कि मत गणना गरेर परिणाम घोषणा गर्न सक्दैन । बैशाख ३१ गतेको परिणाम असार २५ गतेसम्म घोषणा हुँदैन । १ महिना २५ दिन वितिसक्यो । पहिलो चरणको निर्वाचनको परिणाम आएको छैन, किनभने त्यहाँ एमाले अगाडि छ । अरु अगाडि भएको भए आइसक्थ्यो । यसरी सत्ताको दुरुपयोग गरिएको, प्रशासनिक निकायहरुको दुपयोग गरिएको छ । यसरी गरिएको चुनावमा पनि तपाईंहरुले षडयन्त्रका जालहरु तोडेर जित्नु भएको छ । जनताको सुदृढ विश्वासका कारण मात्रै यो सम्भव भएको छ ।
विकास गर्नु छ, अल्मलिने समय छैन
अव तपाईंहरुले विकास निर्माणका योजना बनाउनु छ । विकासका पाँच वर्षे कार्ययोजना र एक वर्षमा के के गर्न सकिन्छ त्यसको छुट्टै योजना बनाउनु पर्नेछ । यस ठाउँको विकास कसरी गर्न सकिन्छ, समग्र विकासको गुरु योजना के हो ? हरेक वर्षका लागि कार्यक्रम के हो ? हाम्रा नीतिहरु के हुन् ? तपाईंहरुले तय गर्नु पर्नेछ । माथिबाट नीतिगत निर्देशनहरु आइसकेका छन् । हाम्रा विकासका नीतिहरु कस्ता छन् ? सामाजिक सद्भाव र राष्ट्रिय एकताका नीतिहरु कस्ता छन् ? पूर्वाधार विकासमा हाम्रा नीतिहरु कस्ता छन् ? ती पनि अध्ययन गर्नुस् । हाम्रा नीतिहरु कस्ता योजना मार्फत, कस्ता कार्यक्रम मार्फत अगाडि बढाउने ? कसरी कार्यान्वयन गर्ने ? त्यो बनाउनु पर्नेछ । अर्काे तपाईंहरुको कार्यकालभरी के गर्ने ? त्यो कार्यक्रम बनाउनु पर्नेछ । हामीले देश बनाउनु पर्नेछ । हामीसँग अल्मलिने समय छैन । देश बचाउनु पनि पर्नेछ ।
देशविरुद्धको अपराध नियन्त्रण गर्छाैं
यसै महिना भित्र संविधान संशोधन गर्ने कुराहरु आइरहेका छन् । संविधान संशोधन नगरी चुनाव नगर्ने कुराहरु आइरहेका छन् । यसचोटी संविधान संशोधन गरेर पनि उनीहरुलाई पुग्दैन । अर्काेपटक फेरि अर्काे संशोधन आउँछ । उनीहरुलाई पहाड र तराई नछुट्याई भएको छैन । अहिलेका सत्तापक्षीय दलको क्षणिक स्वार्थका लागि देश विरुद्ध अपराध गर्न कुनै अप्ठ्यारो छैन । देशभक्त सरकारलाई हटाउनका लागि बनेको यो अपवित्र गठबन्धन हो । यसको उद्धेश्य एमालेलाई रोक्नु, देशको स्वाधीनतालाई रोक्नु हो । यो अपराधिक गठबन्धन मौलिक गठबन्धन होइन । नेपालमा बहुतै ठूलो नोक्सान पुर्याउनका लागि अर्कैले डिजाइन गरी बनाइएको गठबन्धन हो । निकै ठूलो नोक्सान देशलाई पुर्याउने यसको उद्धेश्य छ । हामी देशलाई नोक्सान पुर्याउनबाट रोक्छौं । स्थानीय तहले त्यसलाई रोक्न दवाव दिनु पर्छ ।
लोकतन्त्रका लागि हामी लडेका छौं । नेपालमा कुनै पार्टी एमाले जति लोकतन्त्रका लागि लडेको छैन । यहीँ हुनुहुन्छ नरेश खरेल उहाँ १७ वर्ष जेल बस्नु भयो । नेपाली कांग्रेसमा लोकतन्त्रका लागि १७ वर्ष जेल बसेको कोही छ ? हातमा हत्कडी, खुट्टामा नेलकडी लगाएर लोकतन्त्रका लागि कुर्वानी गरेको कोही नेता छ ? आजको एमाले यतिकै बनेको होइन । लोकतन्त्रका लागि गरेको बलिदानको उपज हो एमाले । लोकतन्त्रप्रतिको निष्ठा र आफ्ना सही नीतिका कारण एमाले यहाँ आइपुगेको हो । मोलतोलका आधारमा यसका नीति तय हुँदैनन् । राष्ट्रको हितका आधारमा एमालेका नीति तय हुन्छन् । लोकतान्त्रिक मुल्य मान्यताका आधारमा, सामाजिक न्यायका आधारमा, सामाजिक सद्भावका आधारमा र राष्ट्रिय एकताका आधारमा यसका नीति तय हुन्छन् । लागातार स्पष्ट र सुदृढ नीति हामीले तय गरेका छौं ।
मधेसी, थारु र जाजाति बढी एमालेबाटै जिते
प्रदेश नम्बर १ बाट जम्मा एक जना मात्रै महिला प्रमुख निर्वाचित हुनु भएको छ । त्यो एमालेबाट निर्वाचित हुनु भएको छ । देशभरमा सबैभन्दा बढी मधेसी कुन पार्टीबाट निर्वाचित छ, एमालेबाट, सबैभन्दा बढी थारु कुन पार्टीबाट निर्वाचित छ, एमालेबाट, सवैभन्दा बढी जनजाति कुन पार्टीबाट निर्वाचित छ, एमालेबाट । यस तथ्यले के वताउँछ ? यस तथ्यले वताउँछ एमाले सामाजिक न्यायको पक्षमा छ । राष्ट्रपति बनाउन पाउँदा महिलालाई राष्ट्रपति एमालेले बनायो, सभामुख बनाउन पाउँदा जनजातिलाई एमालेले बनायो । एमालेका नीतिमा कुनै प्रश्न छैन ।
चुनावमा अर्कैलाई भोट हाल्ने एमाले होइन
यो झापामा हामीले उपमेयर दुईतिहाई जित्यौं । उपमेयर दुईतिहाई जित्दा मेयर ७ जना मात्रै जित्नु पर्ने हो ? मेचीनगर हामीले मेयर हार्ने ठाउँ हो ? त्यहाँ एमाले उम्मेदवारको इतिहास, योगदान, योग्यतासँग तुलना गर्न मिल्ने कुनै उम्मेदवार थिए ? यस ठाउँमा एमालेले मेयर हार्ने सोच्न सकिन्छ ? गौरादहजस्तो ठाउँमा एमालेले मेयर हार्ने सोच्न सकिन्छ ? बुद्धशान्ति जहाँ एमालेले ०४९ साल देखि ४७ का ४७ सिट जित्दै आएको थियो । त्यहाँ पार्टीका जिल्ला अध्यक्ष हार्ने ठाउँ हो ? हामीले विचार त गर्नु पर्यो नि । यस्ता हुनै नसक्ने काम कसरी भए ? एमाले भएर मतदान केन्द्रमा गएर रुखमा भोट हाल्यो भने त्यो एमाले हुन्छ ? त्यस्तो छ भने एमाले होइन त्यो । नीतिका हिसावले एमाले भित्र यो भएन, त्यो भएन भन्ने छ ? अनि आफ्ना कुण्ठा, आफ्ना ब्यक्तिगत आकांक्षा वा लघुताभाषलाई ल्याएर पार्टीलाई नोक्सान पर्ने, पार्टीलाई नोक्सान पारेर देशलाई नोक्सान पर्ने काम एमालेले गर्न सक्छ ? झापामा एमाले भित्र यो पक्ष र त्यो पक्ष छैन ।
देशभरका एमालेका कुनै पनि कार्यकर्ता यो पक्ष र त्यो पक्ष छैन । पार्टीका कार्यकर्ता कोही माथि पनि पक्षपात हुँदैन । म पार्टी अध्यक्षका हिसावले भन्दैछु । तर, आफ्ना नचाहिंदा कुण्ठा बोकेर गुटबन्दी गर्न छुट कसैलाई छैन । हामीले बनाउन खोजेको जाली झेली, कप्टी र षडयन्त्रकारी समाज होइन । हामीले पारदर्शी समाज बनाउन खोजेका हौं । एमालेमा कार्यकर्ताबीच कुनै पक्षपात छैन हुँदैन । तर, एमालेमा निजी कुण्ठा बोकेर पार्टीका विरुद्ध लाग्नेलाई ठाउँ पनि छैन ।
(एमाले अध्यक्ष ओलीले झापाको विर्तामोडमा जिल्लास्तरीय कार्यकर्ता भेलालाई गरेको सम्बोधनको अंश)
