नेपाली कांग्रेसका नेता एवम् पूर्वमन्त्री गगन थापाले बुढानिलकण्ठमा नेकपा एमालेका स्थानीय नेताको घरमा रातभर मतदाता नामावली संकलन भैरहेको घटनाको तीव्र विरोध जनाएका छन् ।
व्यवस्थापिका–संसद्को बैठकमा विशेष समय लिएर उनले यस्तो विरोध जनाएका हुन् ।
“यसअघिका दिनमा मानिसहरुलाई भोलिपल्ट आउनुस् भन्ने तर बेलुकाको पाँचबजेपछि नेताको घरमा पुगेर मतदाता नामावली संकलन भइरहेको थाहा पाएका थियौं,” उनले भने, “यसमा निर्वाचन आयोगको पदाधिकारीको संलग्नता छ भन्न पाउने कि नपाउने ? वडाअध्यक्षजस्तो व्यक्ति यस्तो घृणित काममा लाग्दा त्यो पार्टीले जवाफ दिनुपर्ने कि नपर्ने ?”
उनले काठमाडौंमा नै यस्तो भएको बताउँदै बाहिर कस्तो होला भन्ने प्रश्न गरेका थिए ।
“अरुबेला निर्वाचनको निष्पक्षताका बारेमा प्रश्न उठाउने तर अहिले आफैं संलग्न भएर यस्तो काम गर्ने ?,” उनको प्रश्न थियो, “प्रश्न उठाउने मात्रै होइन, उत्तर कसरी लिने भन्ने हामीलाई राम्रोसँग थाहा छ ।”
उनले यो सरासर चोरीको विषय भएकाले प्रशासनले कारवाही गर्नुपर्ने माग पनि गरे ।
“यो चोरी हो,” उनले भने, “चोरीमा संलग्नलाई प्रशासनले कारवाही गर्दैन भने हामीले न्याय लिने कुरा लिएरै छाड्छौं ।”
