काठमाडौं, २ कात्तिक । तिहारको तेस्रो दिन अर्थात् लक्ष्मी पूजा र दीपावलीको दिन उज्यालो र रमझम चलिरहेको बेला पूर्वप्रधानमन्त्री तथा नयाँ शक्तिका संयोजक डा. बाबुराम भट्टराईले बुकुरा र झोपडी सम्झिएका छन् ।
दीपावलीको साँझ सामाजिक सञ्जाल फेसबुकमा संयोजक भट्टराईले महलहरुमा दीपावली भए पनि बुकुरा र झोपडीहरु दिउँसै अँधेरा हुने भन्दै मोदनाथ प्रश्रितको कवितामार्फत गाउँघरको याद गरेका हुन् । उनी लेख्छन्, ‘प्रत्येक बर्षको दीपावलीमा कवि मोदनाथ प्रश्रितको यो कविता मनमा गुन्जिन्छ-
“बल्छन् महलहरूमा दीपावली हजार
झकमक्क जग्मगाए पैसा हुने वजार
बुकुरा र झोपडी छन् दिउँसै पनि अँधेरा
आएन खै त्यहाँ त कहिल्यै कुनै तिहार!”
समृद्धिलाई मूलमन्त्र बनाउँदै वैकल्पिक शक्तिको रुपमा नयाँ शक्ति पार्टी गठन गरेका उनले तिहारको उपलक्ष्यमा सबैका लागि समृद्धिको कामना गरेका छन् । ‘प्रत्येक बुकुरा र झोपडीमा समेत उज्यालो ल्याउने ‘समृद्धि सबैका लागि’ (Prosperity for All) को लक्ष्य प्राप्ति गर्ने महाभियानमा लाग्न हामी सबैको मन र मष्तिष्कमा ज्ञान र विवेकको ज्योति बलोस्,’ उनी अगाडि लेख्छन्, ‘सबैमा दीपावलीको हार्दिक शुभकामना ।’
