मेचीनगर । नेपाली कांग्रेसमा विगत २८ बर्षदेखि निरन्तर क्रियाशील मेचीनगरकी अग्रणी महिला नेतृ एवम् अन्तर्राष्ट्रिय महिला फुटबल खेलाडी संगीता कार्की राउतले नेपाली कांग्रेस पार्टी परित्याग गरेको घोषणा गरेकी छिन् ।
उनले आज प्रेस विज्ञप्ति प्रकाशित गरी नेपाली कांग्रेसको साधारण सदस्यता समेतबाट राजीनामा गरेको घोषणा गरेकी हुन् ।
२०४६ साल अघिदेखि नेपाल बिद्यार्थी संघमा आवद्ध भई नेपाली कांग्रेसको झापा क्षेत्र नं. १ को क्षेत्रीय कोषाध्यक्ष, नेपाल महिला संघ झापा क्षेत्र नं. १ को सहसचिव र मेचीनगर वडा नं. ४ मा संघको वडा सभापति भइसक्नु भएको उनी नेपाली कांग्रेसको भ्रातृ संस्थाको रुपमा रहेको नेपाल लोकतान्त्रिक खेलकुद महासंघ झापाको जिल्ला कार्य समिति सदस्य समेत थिइन् ।
नेपालको महिला फुटबल क्षेत्रको नक्षत्रको रुपमा चिनिनु भएकी उनी अखिल नेपाल फुटबल संघको महिला समितिको केन्द्रीय सदस्य र महिला फुटबल प्रशिक्षक रही नेपाली महिला फुटबलको विकासमा लागेकीे प्रतिभाशाली व्यक्तित्व हुन् ।
विज्ञप्तिमा महिला नेतृ संगीता कार्की राउतले भनेकी छिन् –‘सचेत नागरिकको रुपमा म नेपाली कांग्रेसका बेथिति र बिकृतिहरुको साक्षी किनारा बसिरहन नहुने निचोडमा पुगेकी छु, तसर्थ आजैका मितिदेखि म नेपाली कांग्रेसको साधारण सदस्यता समेतबाट राजीनामा गरेको घोषणा गर्दछु ।’
नेपाली कांग्रेस निरन्तर राजनीतिक आदर्श, मूल्य र आदर्शहरुबाट बिमुख हुँदै व्यक्तिगत स्वार्थसिद्ध गर्न चाहनेहरुको झुण्डमा पतन हुँदै गएको दावी गर्दै उनले विज्ञप्तिमा भनेकी छिन्–‘पार्टीमा निष्ठापूर्वक खट्ने कार्यकर्ताहरुलाई दाससरह व्यवहार गरिन्छ भने पैसा र पावर भएकाहरु पार्टीभित्र हावी भइरहेका छन् ।’
राम्रोलाई भन्दा हाम्रोलाई प्रोत्साहित गर्ने परिपाटी हुर्किरहेको र त्यागी एवम् प्रतिबद्ध तल्लो वर्गका कार्यकर्ताहरुलाई पाखा लगाउने तमासाले कांग्रेसबाट इमान्दार, पुराना र सिद्धान्तप्रति निष्ठावान कार्यकर्ताहरुको पंक्ति पलायन हुने अवस्था सिर्जना भएको उनको विज्ञप्तिमा उल्लेख छ ।
२०४६ सालपछि सबैभन्दा बढी अवधि सत्तामा नेपाली कांग्रेस बसेको तर उसले राष्ट्रहित र जनहितमा राम्रो काम नगरेका जनाउँदै उनले भनिन्–‘प्रधानमन्त्री र मन्त्रीका कुर्सीहरुमा कैयन पात्र फेरिए, तर उसलाई भोट दिएर जिताउने सामान्य जनता र उसलाई भोट मागेर गाउँ गाउँ र वस्ती वस्ती हिड्ने हामी जस्ता कार्यकर्ताहरुको कहिल्यै भलो हुने काम कांग्रेस पार्टी र त्यसका नेताहरुबाट भएनन् । बरु, राष्ट्रहित र जनहित विपरीतका बिकृत एवम् बिसंगतिपूर्ण गतिविधिहरु एकपछि अर्को गर्दै हुँदै आएका छन् । यस्तो बेथितिलाई रोक्न आग्रह गर्दा नेतृत्व तहबाट अझ संरक्षण र ढाकछोप गर्ने प्रबृत्तिले प्रोत्साहन पाएको हुँदा बेथितिका दृश्यहरु गाउँदेखि केन्द्रसम्मै टुलुटुलु हेरिरहनु पर्ने अवस्था विद्यमान छ । यसबाट कांग्रेस पार्टी अब जनताको हित गर्ने पार्टी रहेन भन्ने निष्कर्ष निस्किएको छ ।’
अध्ययनशील र सबल नेतृत्व क्षमता भएकी उनले स्वतन्त्र नागरिकको जीवन जिउने र आगामी दिनमा सही मार्गमा लाग्दै सामाजिक कार्यमा अघि बढिरहने प्रतिबद्धता व्यक्त गरेकी हुन् ।लोकतन्त्रपोष्ट
