काठमाडौं, १६ फागुन- नेपाल टेलिकमले फागुपूर्णिमा अर्थात् होलीको अवसर पारेर विभिन्न अफर सार्वजनिक गरेको छ ।

अफर यही फागुन १७ गतेदेखि चैत १ गतेसम्म जारी रहने छ । राजधानी काठमाडौंसहित पहाडी क्षेत्रमा १७ र तराई/मधेसमा १८ गते होली मनाइँदै छ ।

अफरअन्तर्गत टेलिकमले राति १० देखि बिहान ६ बजेसम्म प्रयोग गर्न सकिने अनलिमिटेड भ्वाइस नाइट कल अफर उपलब्ध गराउने भएको छ। ३५ रुपैयाँमा खरिद गर्न सकिने अफरबाट ३ दिनसम्म कल गर्न सकिने छ।

यस्तै ५० रुपैयाँमा अलटाइम अनलिमिटेड डाटा प्रयोग गर्न सकिने छ। थ्रीजी/फोरजीको स्पिडमा चल्ने डाटा खरिद गरेको २४ घण्टासम्म यसको प्रयोग गर्न सकिनेछ । त्यसपछि भने २५६ केबीपीएसको गतिमा चल्ने छ।

एक रातका लागि मात्र प्रयोग गर्नका लागि अनलिमिटेड नाइट डाटा प्याक उपलब्ध हुनेछ। सो नाइट डाटा प्याक १५ रुपैयाँमा राति १० देखि विहान ६ बजेसम्म प्रयोग गर्न सकिने छ। १ जीबी डाटा थ्रिजी/फोरजीको गतिमा चल्ने छ। त्यसपछि भने २५६ केबीपीएसको गतिमा चल्ने छ।

अनलिमिटेड भ्वाइस, डाटा र एसएमएस अफर खरिद गरेपछि एक घण्टासम्म कम्पनीको नेटवर्क भित्र अनलिमिटेड कल गर्न, एसएमएस गर्न र डाटा चलाउन सकिने छ। सो प्याक २५ रुपैयाँमा खरिद गर्न सकिने छ।

होली अफरका विभिन्न प्याक खरिद गर्नका लागि जीएसएम मोबाइलबाट (१४१५) डायल गर्न सकिने टेलिकमले जनाएको छ।