बैतडी, १६ पुस । बैतडीमा एक महिला अधिकारकर्मीबाटै निर्घात कुटिएकी छिन् । नेपाल महिला संघकी केन्द्रीय सदस्य तथा अन्तरपार्टी महिला सञ्जालकी जिल्लासचिव कान्ता चन्दको कुटाइबाट गुरुखोला–८ की २९ वर्षीया माधवी भट्ट गम्भीर घाइते भएकी छिन् ।
आजको नयाँ पत्रिकामा खबर छ– कुटपिटबाट भट्टको टाउको र शरीरमा गम्भीर चोट लागेको छ । घाँटी र कम्मरमा लागेको चोटका कारण उनी हिँड्न नसक्ने अवस्थामा छिन् । उपचारका क्रममा उनको टाउकोमा पाँच टाका लगाइएको छ । घरायसी विवादका कारण बुधबार उनीहरूबीच झगडा भएको प्रहरी चौकी गुरुखोलाका प्रहरी सहायक निरीक्षक देवदत्त भट्टले जानकारी दिए ।
बाख्रा बारीमा पसेको र पानीको धाराको विषयमा विवाद हुँदा महिला अधिकारकर्मी चन्दले छिमेकी भट्टमाथि कुटपिट गरेको पाइएको प्रहरी सहायक निरीक्षक भट्टले जानकारी दिए । ‘चन्दको बाख्रा भट्टको बारीमा पस्दा विवाद भएको र सार्वजनिक पानीको धाराको विषयमा पनि विवाद रहेछ,’ असइ भट्टले भने ।
कांग्रेस पूर्वमहासमिति सदस्यसमेत रहेकी महिला संघकी केन्द्रीय सदस्य चन्दले आफूमाथि गलत लान्छाना लगाउने गरेको र अश्लील गालीगलौज गरेकाले आक्रोशमा कुटपिट गरेको स्विकारिन् । ‘माधवीले गाली गरेपछि सहन सकिनँ,’ चन्दले नयाँ पत्रिकासँग भनिन्, ‘मेरो पनि हातमा चोट लागेको छ ।’ माधवी र अधिकारकर्मी चन्दको घर सँगसँगै छ । उनीहरूबीच घरायसी विवादका कारण वेलावेला ठूलै झगडा पर्ने गरेको असइ भट्टले बताए ।
घाइते माधवी न्याय माग्दै सदरमुकाम आएकी छिन् । उनले आफूमाथि अधिकारकर्मीबाटै अन्याय भएको भन्दै आवश्यक कारबाहीका लागि माग गरेकी छिन् । चन्दले यसअघि पनि आफूलाई विभिन्न समयमा दुःख दिने गरेको बताउँदै उनले भनिन्, ‘प्रहरीले मिलापत्र मात्रै गराउन खोज्छ, मेरो पक्षमा कोही बोल्दैन ।’ आवश्यक उपचारसमेत गरिनुपर्ने उनको माग छ । घटनाको छानबिन गरी न्यायको माग गर्दै माधवीले चन्दविरुद्ध जिल्ला प्रहरी कार्यालयमा निवेदन दिएकी छिन् । जिल्ला प्रहरी कर्यालयका अनुसार दुवै पक्षसँग घटनाबारे सोधपुछ भइरहेको छ ।
पीडित माधवकी आमा नन्दादेवी भट्टले महिलाका लागि वकालत गर्ने महिलाबाटै महिला हिंसा हुनु दुःखद भएको भन्दै घटनाको छानबिन गरी दोषीलाई तत्काल कारबाही हुनुपर्ने माग गरिन् । ‘महिला अधिकारकर्मीबाटै महिला हिंसा भएको छ,’ उनले भनिन्, ‘दोषीलाई कडाभन्दा कडा कारबाही गर्नुपर्छ ।’
प्रतिक्रिया
सम्बन्धित खवर
