दमक/लगातर अठार पुराण लगाएर पुण्यभूमि बनेको झापाको लखनपुर ४ र ५ नम्बरको बिचमा रहेको सिद्धेश्वरधाम अहिले माल पाएर चाल नपाएको अवस्थामा रहेको पाईएको छ । गुरुकुल सहितको धामको गुरुयोजना बनाउन पहल शुरु गरिएको बताईएपनि अहिलेसम्म परम्परागत रुपमा नै चल्दै आएको छ । ग्रामिण क्षेत्रमा रहेका कारण प्रचारप्रसारको अभावले यो क्षेत्र ओझेलमा परेको छ । परम्परागत धर्म र संस्कार जर्गेर्नाका लागि करिब दूई दशकदेखि सिद्धेश्वर शिब मन्दिर धार्मिक संरक्षण संस्थाको नाममा स्थानीयहरु यस क्षेत्रको बिकासमा जुटेपनि राज्यका कुनै पनि निकायको अहिलेसम्म यहाँ सहयोग पुगेको छैन ।
प्रत्येक घरबाट एकमुठि चामल(मुष्ठिदान) उठाएर अविछिन्न रुपमा अठार पुराण लगाइसकिएको र धार्मिक तथा पौराणिक बिश्वास अनुसार यो क्षेत्र पुण्यभूमि बनेको संस्थाका संरक्षक तथा यहाँ सञ्चालित गुरुकुलका अध्यक्ष जयनारायण अधिकारीले बताए । उनका अनुसार २० बर्षदेखि अटूट रुपमा दियो निभ्न नदिइकन यहाँ लक्ष्यवर्ती दीप प्रज्वलन गरिएको छ भने यसलाई हेर्नका लागि पूजारी समेत राखिएको छ ।
जग्गादाता जयनाराण अधिकारी सहितका दानबिरहरुले प्रदान गरेको करिब १० कठ्ठा जमिनमा फैलिएको धार्मिक संरक्षण संस्थाको आम्दानीको श्रोत र सञ्चालनको एकमात्र माध्यम मुष्ठिदान हो । हरेक घरबाट एकमुठि चामल दान मागेर अहिलेसम्म थुपै्र पूर्वाधारहरु निर्माण भएको छ । झण्डै एककरोड बराबरको भौतिक सम्पती जोडिएको ट । सिद्धेश्वर मन्दिर, पुराण भन्ने ब्यास, पाकशाला, गुरुआश्रम, कार्यालय भवन, हवन कुण्ड निर्माण भएको छ । अहिले गुरुकुल शिक्षाका लागि भवन समेत बन्दै आएको छ । नजिकै जेष्ठ नागरिक भवन समेत बन्ने तयारीमा छ ।
पछिल्लो समय पढेका र संस्कार जानेका पुरोहित तथा पंण्डितहरु पाइन छाडेकाले त्यसलाई ख्याल गर्दै गुरुकुल पनि शुरु गरिएको पाईएको छ । श्राद्ध गर्दा होस् या कुनै पनि धार्मिक कार्य गर्दा सस्कृत पढेका बिद्धानहरुको अभाव रहेका कारण यसलाई पूर्ति गर्नका लागि गूरुकुल पढाई शुरु गरिएको अधिकारी बताउछन् । ३० जना बिद्यार्थीहरु अहिले आवासीय रुपमा यहाँ पढ्दैछन् । यसका साथै स्थानीय महिलाहरु समेत गीता, भागवत लगायतका धार्मिक ग्रन्थहरु पढीरहेको उहाँको भनाई छ ।
लगातर अठार पुराण सम्पन्न गरेर पुण्यभूमि बनेको यस स्थलको आपासको जग्गा समेत लिएर चक्रपथ निर्माण गरि बिभिन्न देवीदेवताहरुको प्रतिमा तथा साना मन्दिरहरु बनाउने, फूलबारी बिकास गराउने र वातवरणीय संरक्षणका लागि धार्मिक जागरण ल्याउन ‘सिद्धेश्वर हरित धार्मिकधाम’ बनाउने उदेश्य रहेको भएपनि केहि काम अघि नबढेको स्थानीयहरु बताउछन् ।
यसैका साथै धर्मको बिषयमा नयाँ पुस्ताले त झनै अध्ययन गर्न पाएको छैन र उनीहरुलाई त्यस्तो अवसर नमिलेकाले धार्मिक पुस्ताकलय खोल्ने समेत गुरुयोजनामा समावेश गरिने भएको छ । यहाँ लगाईएको अठार पुराण र अन्य उपपुराणहरुका पुस्तकहरु सुरक्षित राखिएकाले अब ति पुस्तकहरु सहित धार्मिक अध्ययन केन्द्र तथा पुस्ताकालयको स्थपना गर्ने उदेश्य रहेको पाउदा आफूलाई खुसि लागेको साँसद दीपक कार्की बताउछन् । उनले पनि यसैबर्ष मात्र यस धामको बिषयमा जानकारी पाएको जनाए । उनले आएर यस धामको बिकासमा आफ्नो सहयोग रहने जनाएका थिए ।                                                                                 बिष्णुप्रसाद पोखरेल