काठमाण्डु, ७ फागुन – श्रम तथा रोजगार कार्यालय विराटनगरका तत्कालिन प्रमुख प्रेमप्रसाद सञ्जेलले पहिलेकै कार्यालयमा समायोजन नगरे अदालत जान बाध्य हुने चेतावनी दिएका छन् ।
प्रधानमन्त्री, संघीय मामिला तथा समान्य प्रशासन मन्त्री, सचिव र श्रम रोजगार तथा समाजिक सुरक्षा मन्त्रालयलाई पत्र लेखेर सञ्जेलले अन्यत्र खटाए अदालत जान बाध्य हुने चेतावनी दिएका हुन । उनले पठाएकोे हस्तलिखित पत्रमा भनेका छन, ‘कानून बिपरित विराटनगर स्थित श्रम तथा रोजगार कार्यालयबाट काज सरुवा गरिएकोले मेरो समायोजन एक नम्बर प्रदेश अन्र्तगतको सोही कार्यालयमा होस ।’
२५ असोज २०७५ मा श्रम तथा रोजगार कार्यालयमा बरिष्ठ श्रम अधिकृतको रुपमा हाजिर भएका सञ्जेलको ९ पुसमा सीप विकास कार्यालय सुनसरीमा कामकाज गर्नेगरि सरुवा गरिएको थियो । उनी हालसम्म काज सरुवा भएको कार्यालयमा हाजिर भएका छैनन । सञ्जेलले एक नम्बर प्रदेशको श्रम तथा रोजगार कार्यालयमा रहेर काम गर्ने गरि समायोजना फारम भरेको बताएका छन् ।
श्रम तथा रोजगार कार्यालयमा आएपछि सञ्जेलले नक्कली जलबिद्युत्त आयोजना र कृषि कम्पनी खोलेर कर्मचारीलाई पारिश्रमिक नदिने, उद्योगमा पारिश्रमिक नदिने र बैदेशिक रोजगारका नाममा ठगी गर्नेहरुलाई पक्राउ गरी कारबाही गराउन थालेका थिए ।
यसबाहेक योगदानमा आधारित समाजिक सूरक्षा योजना लागू गराउन र श्रम ऐन अनुसार मजदुरको न्युनतम पारिश्रमिक दिलाउने थालनी सञ्जेलले गरेका थिए ।
घुस नखाने र अरुलाई पनि खान नदिने अडान भएका सञ्जेलको श्रम तथा रोजगार कार्यालयबाट असमय सरुवा भएपछि खुलेर विरोधमा उत्रिएर चर्चित भएका थिए । उनी अहिले भ्रष्टचार बिरोधी सेलिब्रेटी नै बनेका छन् ।
