काठमाडौँ –निर्वाचन आयोगको प्रमुख आयुक्तको नाम सिफारिसको विषयलाई लिएर जुहारी चल्न थालेको छ । यो समाचार आजको नेपाल समाचारपत्रमा गंगा बरालले लेखेका छन् ।
मंगलबार सिंहदरवारमा बसेको संघीय संसदको संसदीय सुनुवाई समितिको बैठकमा सदस्यहरूबीच यसै विषयमा जुहारी चल्यो । नेपाल कम्युनिस्ट पार्टी (नेकपा) का सांसद योगेशकुमार भट्टराई र कांग्रेसका सांसद ज्ञानेन्द्रबहादुर कार्कीबीच त घोचपेच नै चल्यो ।
सांसद् भट्टराईले प्रधानमन्त्री भइसकेका शेरबहादुर देउवाले प्रधानमन्त्रीलाई सजिलो होस् भनेर नै परिषद् बैठकमा नआउनुभएको हो कि भन्दै व्यङ्ग्य गरे । देउवा काठमाडौंमा भएर पनि परिषद बैठकमा नआएको नेकपाको आरोप छ ।
‘केही गुनासा भए बैठकमा आएर राख्न सकेको भए राम्रो हुन्थ्यो’ भट्टराइले भने ‘असहमतिलाई देउवाजीले वैधानिक हिसावले दर्ज गर्नुभएको भए त्यसको सान्दर्भिकता बढने थियो, देउवाजीको प्रक्रिया गलत भयो ।’
भट्टराइले बोलिसकेपछि बोल्ने पालो पाएका कांग्रेस सांसद कार्कीले संवैधानिक परिषदलाई ‘रबरस्टाम्प’ बनाउन खोजिएको आरोप लगाए । संवैधानिक परिषदको महत्व नबुझिएको हो कि जस्तो लाग्छ, परिषद अध्यक्ष प्रधानमन्त्री ओलीले हिँडेको बाटो पूर्णरुपमा गलत छ’ कार्कीले भने ‘सरकार सबै निकायलाई ‘क्याप्चर’ गर्न लागेको छ, वैधानिक रुपले सभापति देउवाले बैठकमा आउन सक्दिन भनेपछि बैठक बोलाइहाल्नुपर्ने तत्काल कुनै बाध्यता थिएन ।’
