दोलखा, १० चैत  । नेपाली कांग्रेस दोलखाका प्रभावशाली नेता टंक जिरेल एमालेमा प्रवेश गर्ने भएका छन् । २०७३ चैत १३ गते जिरीमा आयोजित कार्यक्रममा उनी एमालेमा प्रवेश गर्ने कार्यक्रम छ । उनलाई एमाले पोलिट्ब्यूरो सदस्य पशुपति चौलागाईले एमालेमा प्रवेश गराउने कार्यक्रम छ । एमाले केन्द्रीय सदस्य तथा सांसद पार्वत गुरुङ र दोलखा एमाले अध्यक्ष इश्वर पोखरेलसहितका नेताहरुको  पहलमा जिरेल एमालेमा प्रवेश गर्न लागेका छन् । जिरेलले सामाजिक संजाल फेसबुकमा नेपाली कांग्रेस परित्याग गरेको घोषणा गरिसकेका छन् ।    जिरी गाउँ विकास समितिका पूर्वअध्यक्ष जिरेल दोलखा कांग्रेसका पुराना र प्रभावशाली नेताका रुपमा चिनिन्छन् । जिरेललाई एमालेले नवघोषित जिरी नगरपालिकाको नगरप्रमुखमा उम्मेदवार बनाउने चर्चा छ । दोलखामा सात गाउँपालिका र दुई नगरपालिका छन् । सातै गाविस र नगरपालिकामा एमालेको पकड बलियो बनाउन जिल्लाका सबै सांसद गाउँ गाउँमा संगठन विस्तारमा जुटेका छन् । दोलखामा एमाले अलि कमजोर रहेको जिरी नगरपालिकामा पूर्व अध्यक्ष जिरेलको प्रवेशले अब दोलखामा एमालेको संगठन मजबुत भएको छ, युवासंघ दोलखाका अध्यक्ष महाराज गुरुङले भने–‘अब हामी सातै गाउँपालिका र दुई नगरपालिका जित्छौं ।’