काठमाडौँ/ नेपाल कम्युनिष्ट पार्टीका स्थायी कमिटी सदस्य भीम रावलले आफूलाई जिम्मेबारीबारे उपदेश दिने धृष्टता नगर्न प्रधानमन्त्रीका प्रेस सल्लाहकार सूर्य थापालाई चेतावनी दिएका छन्।
पार्टी स्थायी कमिटी बैठकका निर्णयबारे प्रवक्तालाई बाइपास गरेर नेता रावलले पत्रकारलाई जानकारी गराएपछि प्रेस सल्लाहकार थापाले आपत्ति प्रकट गरेका थिए। पार्टी पद्धति भन्दा बाहिर गएर मिडियासँग कुराकानी गरेको विषयबारे सामाजिक सञ्जालमार्फत थापाले आपत्ति प्रकट गरेको भोलिपल्ट नेता रावलले आफूलाई जिम्मेबारीको उपदेश नदिन प्रेस सल्लाहकार थापालाई चेतावनी दिएका हुन्।
‘मलाई जिम्मेवारीको उपदेश दिने घृष्टता गर्ने अधिकार सूर्यजीले कहाँबाट पाउनु भयो त भन्नेबारे भने उहाँले खुलाउनु भएन। बालुवाटारमा प्रधानमन्त्रीको प्रेस सल्लाहकार भएपछि उहाँले पार्टी अध्यक्ष भएझैँ गरी आदेश/निर्देश गर्ने अधिकार र हैसियत प्राप्त भएको भ्रम परेछ क्या रे। पार्टी विधानले पार्टीका निर्णित विषयहरुबारे प्रवक्ता वा प्रचार विभागका प्रमुख वा उपप्रमुखले मात्र बोल्न पाउने भनी कतै लेखेको छ कि?’ नेता रावलको भनाइ उद्धृत गर्दै उनका स्वकीय सचिव गोविन्द दुवालले फेसबुकमा लेखेका छन्।
‘अछाममा एउटा प्रसिद्ध उखान छ, ‘ताल खुसेको थापाउदिन पटुका गड्याउदि’ अर्थात् लुगा तल झरिसक्यो, कम्मरमा पटुका कसेर के गर्ने ? सूर्य थापाले मलाई सुदूरपश्चिमको इञ्चार्ज भएकोले संचार माध्यममा नबोल्न उपदेश दिनुभएको रहेछ। आफू प्रचार विभागको उपप्रमुख भएकोले अबदेखि अरुले संचार माध्यममा बोल्न नहुने आदेश जारी गर्नुभएको रहेछ। पार्टी विधानमा स्थायी कमिटीको बैठक तीन महिनामा र केन्द्रीय कमिटीको बैठक ६ महिनामा बस्नुपर्ने किटानी व्यवस्थाको किन पालना भएन भनी पार्टीका कुनै नेताले भन्नुभयो भने सूर्य थापाजी ती नेताको मुखमा पनि पट्टी बाँध्न जमजामाउनु हुने हो कि? म सुदूरपश्चिम प्रदेशको मात्र इञ्चार्ज भएको र राष्ट्रिय महत्वका विषयमा बोल्न नपाउने वा बोल्न नहुने हैसियतको व्यक्ति भएको भन्ने सूर्य थापाजी भ्रममा हुनुहुन्छ भने त्यस्तो भ्रमबाट मुक्त हुनु स्वास्थ्यको लागि लाभप्रद होला । कुनै क्षेत्र वा कमिटीको काममा अरुले हस्तक्षेप गर्ने भन्ने कुरा र पार्टीका निर्णित वा वहसका विषयमा भन्न बोल्न पाउने कुराको भिन्नता सहजै बुझिने कुरा हो । साथै यो व्यवस्था कसैले देश, जनता र पार्टीको बारेमा बोल्न नपाउने, सुगाजस्तो रटेरटाएको कुरा तोकिएको आज्ञाकारीले रामराम भने जस्तो मात्र गर्न पाउने व्यवस्था होइन र नेपाली जनताको बलिदान कुनै निरंकुशताका लागि होइन भन्ने कुरासमेत सबै सचेत नेपालीले जाने बुझेकै विषय हो,’ भीम रावलको भनाइ उद्धृत गर्दै दुवालले सामाजिक सञ्जालमा लेखेका छन्।
यसअघि प्रधानमन्त्री केपी ओलीका प्रेस सल्लाहकार तथा नेकपा प्रचार विभागका उपप्रमुख थापाले मिडियामा रावलले दिएको अन्तर्वार्तालाई उल्लेख गर्दै स्थायी कमिटीकाे बैठकका निर्णयहरु किन आआफैँ प्रवक्ताजस्तो गरी टेलिभिजन क्यामेरासामु प्रस्तुत हुन उछिनपाछिन गर्नुभएकाे हाेला भन्दै आपत्ति प्रकट गरेका थिए। सोही सन्दर्भमा रावलको भनाइ आएको हो।
थापाले देशसञ्चारसँग कुरा गर्दै रावल सुदूर पश्चिम क्षेत्रको प्रमुख भएकाले उनले अधिकारक्षेत्रभन्दा बाहिर गएर अभिव्यक्ति दिएको भन्दै फेसबुकमार्फत आपत्ति प्रकट गरेको बताएका थिए। उनले आफूले आइतबार राति १०:२४ बजे राखेको उक्त स्टाटस डिलिट नगरेको वा सीमित नगरेको पनि देशसञ्चारसँग बताए।देशसञ्चारबाट साभार
