२१ बैशाख– एमाले अध्यक्ष केपी शर्मा ओलीले प्रधानन्यायाधीश विरुद्ध ल्याइएको महाभियोग तत्काल फिर्ता लिन प्रधानमन्त्री पुष्पकमल दाहाललाई आग्रह गरेका छन् । सिंहदरवारस्थित सभामुखको कार्यकक्षमा बिहीवार प्रधानमन्त्री दाहालसँग भएको भेटवार्तामा ओलीले स्थानीय तहको निर्वाचनमा मुलुक होमिएका बेला महाभियोग ल्याएर सत्तारुढ दलहरुले परिस्थिति भाँड्ने दिशामा लगेको समेत वताए ।
‘महत्वपूर्ण काम एकथरी छ, संविधान कार्यान्वयन गर्न चुनाव गर्ने बाटो हिंड्नु पर्नेछ । तर, तपाईंहरु किन यस्तो उल्टो उल्टो बाटो हिंड्न खोजिरहनु भएको छ ?’ भेटवार्तामा ओलीको भनाई उद्धृत गर्दै स्रोतले भन्यो, ‘मुलुकलाई नकारात्मक दिशामा लैजानेगरी ल्याइएको महाभियोग तत्काल फिर्ता लिनुस्, नभए हामीले कडा कदम चाल्नु पर्ने अवस्था आउँछ ।’
बैठकबाट बाहिर निस्कने क्रममा प्रतिक्रिया दिंदै ओलीले भने– ‘अनुचित तवरले ल्याइएको महाभियोग फिर्ता लिनुस्, यो गलत काम सच्याउनुस् भनेको छु । सायद उहाँहरुले फिर्ता लिनुहुन्छ होला ।’
सरकारले संविधान संशोधन गर्न संसदमा दर्ता गराएको संशोधन प्रस्तावका विषयमा पनि ओली र प्रधानमन्त्री दाहालका बीच छलफल भएको थियो । ओलीले संविधान संशोधन प्रस्ताव ल्याउने तर, पारित नहुने भएपछि प्रक्रिया अड्काएर राख्ने गरेको र संशोधनलाई अनावश्यक प्रचारबाजी गरेको वताएका थिए । ‘पहिले संशोधन प्रस्ताव किन ल्याउनु भो, पछि फेरि त्यसलाई किन फिर्ता गर्नु भो ? फेरि अर्काे ल्याउनु भो, फेरि यसलाई किन टुंगोमा पुर्याउनु भएन ?’ ओलीको प्रश्न थियो, ‘कि प्रक्रियामा लगेर टुंग्याउने आँट गर्नु पर्यो कि फिर्ता लिनु पर्यो । संशोधनका नाममा मुलुकको कार्यसूचीलाई प्रभावित नपार्नुस् ।’
दुई चरणका चुनावका बीचमा बजेट प्रस्तुत गर्ने कि नगर्ने भन्ने विषयमा पनि उनीहरुबीच छलफल भएको थियो । ओलीले संविधानले जेठ १५ गते नै बजेट ल्याउनु पर्ने स्पष्ट ब्यवस्था गरेकाले त्यसलाई सारेर गलत परम्परा नबसाल्न आग्रह गरे । उनले बजेट अगाडि नै दोस्रो चरणको चुनाव गर्नु पर्ने वताएका थिए । ‘बजेट जेठ १५ गते ल्याउने कुरा संविधानले नै ब्यवस्था गरेको छ, त्यसलाई दायाबाया गर्नु हुँदैन’ बैठकपछि ओलीले भने ।
माओवादी नेता नारायणकाजी श्रेष्ठले दोस्रो चरणको चुनावलाई बजेट अघि ल्याउने वा बजेटलाई दोस्रो चरणको चुनावपछि सार्न आवश्यक कानुनी परामर्श गर्ने विषयमा छलफल भएको वताए । उनले अन्य दलहरुसँग पनि छलफल गरेर यस विषयलाई टुंगोमा पुर्याउने वताए ।
