दमक÷ बिहीबार झापामा थप २ जनामा कोरोना सङ्क्रमण पुष्टि भएको छ । सङ्क्रमित हुनेहरुमा कनकाई नगरपालिकाका १ जना र मेचीनगर नगरपालिकाका १ जना छन् । कनकाई नगरपालिकाका सङ्क्रमित हुनेमा दलित सामुदायिक भवनको क्वारेन्टाइनमा बस्दै आएका कनकाई–७ का ३४ वर्षीय पुरmष भएको क्वारेन्टाइन व्यवस्थापनमा खटिनु भएका लक्ष्मी अधिकारीले जानकारी दिनुभयो ।
उनी कतारबाट असार २४ गते स्वदेश फर्किएका र २५ गते कनकाई नपामा आएर क्वारेन्टाइनमा बसेको पनि अधिकारीले जनकारी दिनुभयो । अधिकारीका अनुसार गत असार २९ गते ८ जनाको स्वाब सङ्कलन गरी परीक्षणका लागि कोसी अस्पताल विराटनगर पठाइएको थियो । सोको आज आएको रिपोर्टमा एक जनामा कोरोना सङ्क्रमण देखिएको हो । योसँगै कनकाई नगरपालिकाका १२ जनामा कोरोना सङ्क्रमण पुष्टि भएको छ । यद्यपि यसअघिका ११ जनाले भने कोरोना जितेर घर फर्किसकेको पनि अधिकारीले जानकारी दिनुभयो । आज सङ्क्रमण पुष्टि भएकालाई गोठगाउँस्थित पूर्वाञ्चल विश्वविद्यालयको कोभिड अस्पताल पठाइएको पनि अधिकारीले जानकारी दिनुभयो ।
त्यस्तै झापाको मेचीनगर नगरपालिकामा थप सङ्क्रमण पुष्टि भएकामा गत असार १७ गते भारतको दिल्लीबाट आएर क्वारेन्टाइनमा बस्दै आएकी २७ वर्षीया महिला भएको नगरपालिकाको उपप्रमुख मीना पोखरेल उप्रेतीले जानकारी दिनुभयो । असार २९ गते स्वाब सङ्कलन गरी पठाइएका २२ जनामध्ये एक महिलामा मात्र कोरोना सङ्क्रमण पुष्टि भएको हो । उनलाई उपचारका लागि विराटनगरस्थित कोभिड अस्पताल पठाइएको नगरपालिकाको उपप्रमुख उप्रेतीले जानकारी दिनुभयो । उनी मेचीनगर–४ की हुन् । यसअघि हिजो बुधबार भद्रपुर नगरपालिका –१० का दुई जना महिलामा कोरोना भाइरस सङ्क्रमण पुष्टि भएको थियो । आज सङ्क्रमण पुष्टि भएका दुई जनासँगै झापामा पुष्टि हुनेको सङ्ख्या ३ सय १० पुगेको छ ।
