वैदेशिक रोगजारीका क्रममा विदेशिने नेपाली कामदारको मृत्युको तथ्याङ्क डरलाग्दो देखिएको छ । आर्थिक वर्ष (आव) २०७३/७४ को आर्थिक सर्वेक्षणका अनुसार विगत नौ वर्षमा वैदेशिक रोजगारीका क्रममा विभिन्न मुलुकमा कार्यरत् ५ हजार ४ सय ४४ जनाले ज्यान गुमाएका छन् ।
सर्वेक्षणका अनुसार आव २०६५/६६ देखि २०७३/७४ को फागुन महिनासम्ममा ५ हजार ३ सय २८ पुरुष र १ सय १६ जना महिलाले रोजगारीका क्रममा विदेशमा मृत्युवरण गरेका छन् ।
चालू आवको फागुन सम्ममा मात्र ३ सय १५ जनाले विदेशी भूमिमा ज्यान गुमाएका छन् । जसमा ३ सय ८ पुरुष र ७ महिला छन् ।
आव २०७१/७२ मा सबैभन्दा धेरै नेपालीले ज्यान गुमाएका छन् । उक्त आवमा १ हजार पुरुष र ६ जना महिला गरी १ हजार ६ जनाले मृत्युवरण गरेका छन् ।
त्यस्तै, आव २०७२/७३ मा ८ सय १५, आव २०७०/७१ मा ८ सय ७६, आव २०६९/७० मा ७ सय २२ र आव २०६८/६९ मा ६ सय ४७ जनाले विदेशी भूमिमा ज्यान गुमाएका छन् ।
आव २०६७/६८ मा ५ सय ६६, आव २०६६/६७ मा ४ सय १९ र आव २०६५/६६ मा ७८ जनाले ज्यान गुमाएको आइतवार मन्त्रालयले सार्वजनिक गरेको सर्वेक्षणमा उल्लेख छ ।
सर्वेक्षणका अनुसार विगत नौ वर्षमा ७ सय १८ जना विदेशमा रोजगारीका क्रममा विरामी र अंगभंग भएका छन् ।
वैदेशिक रोजगार विभागका अनुसार हालसम्म विभिन्न मुलुकमा गरेर झण्डै ४० लाख नेपाली वैदेशिक रोजगारीमा छन् ।
चालू आवको फागुनसम्ममा विदेशमा मृत्युवरण गरेका मृतकका परिवारलाई ९ करोड ४० लाख १५ हजार रुपैयाँ र अंगभंग तथा घाईते भएका १ करोड ५८ लाख ९१ हजार रुपैयाँ आर्थिक सहायता दिइएको सर्वेक्षणमा जनाइएको छ ।
बैदेशिक रोजगारीका क्रममा विदेश गएर मृत्यु वरण गर्नेको संख्या माओवादी सशस्त्र संघर्षका क्रममा मारिएका मानिसको एकतिहाइ हुन आउँछ । सरोकारवालाहरु यसलाई बैदेशिक रोजगारीको एउटा भयाभह तस्वीरको रुपमा लिने गर्दछन् ।
तस्वीर स्रोतः द इण्डियन एक्सप्रेस, गतबर्ष अफगानस्तानको काबुलमा मारिएका नेपालीको शव अगाडी रुदै आफन्त ।
