काठमाडौँ, २४ जेठ – नेकपा एमालेका बरिष्ठ नेता माधवकुमार नेपालले नयाँ सरकारप्रति आफ्नो पार्टीको पूर्णसमर्थन वा पूर्ण विरोधको नीति नरहने बताएका छन् ।
समसामयिक राजनीतिक विषयमा प्रेस चौतारी नेपालले बुधबार आयोजना गरेको अन्तरसंवादमा उनले तोकिएको समयमा सबै तहको शान्तिपूर्ण र धाँधलीरहित निर्वाचन गर्न सक्नुपर्ने बताए ।
सरकारको नीति व्यवहार र कामका आधारमा एमालेको समर्थन र विरोधको नीति रहने नेपालले दोहोर्याए । भरतपुर महानगरपालिकाको वडा नं– १९ मा पुनःमतदान गराउने निर्णय उचित नभए पनि सर्वोच्च अदालतले यस सम्बन्धमा उपयुक्त निकास दिने बिश्वास उनले राखे । नेता नेपालले भने– “नयाँ सरकारले एमालेलाई पन्छ्याएर सर्वस्वीकार्यताको नाममा संविधान संशोधनको प्रयास र स्थानीय तहको सङ्ख्या पुनरावलोन गरिए आफ्नो पार्टीलाई यो मान्य हुँदैन ।”
देशभक्तिको भावनालाई केन्द्रमा राखेर सुशासन, विकास र समृद्धिका काममा सबैलाई समेटेर जान नवनिर्वाचित प्रधानमन्त्रीलाई मौका रहेको भन्दै त्यसैका आधारमा उनको मुल्यांकन हुने उनले बताए ।
दोस्रो चरणको स्थानीय तहको निर्वाचनमा तराई–मधेसमा पनि एमाले पहिलो शक्ति हुने दाबी नेपालको थियो । उनले भने “कम्युनिष्ट पार्टी हुर्केकै तराईमा हो, हाम्रो पार्टीका अधिकांश महाधिवेशन पनि तराई– मधेसमा नै भएका छन, त्यसैले त्यहाँ हाम्रो प्रभाव राम्रो रहनेछ ।”
