फ्रान्सकी ११६ वर्षकी महिला कोरोना भाइरसको संक्रमण जित्न सफल भएकी छन् । फ्रान्सेली नन लुसिली रान्डनले सन् १९४४ मा सिस्टर एन्ड्री नाम लिएकी थिइन् ।उनले ११७ औँ जन्मदिनअघि कोरोना संक्रमण जितेर घर फर्किएकी हुन् । जनवरी १६ मा उनी कोरोना भाइरसबाट संक्रमित भएको पुष्टि भएको थियो । उनमा कुनै लक्षण भने देखिएन ।आफू संक्रमित भएको आशंका समेत नगरेको उनले स्थानीय सञ्चारमाध्यमलाई बताएकी छन् । तोउलोनमा रहेको रिटायरमेन्ट होममा बस्दै आएकी उनलाई संक्रमण पुष्टि भएपछि आइसोलेशनमा राखिएको थियो ।हाल उनी पूर्ण रुपमा संक्रमण मुक्त भएकी छन् । दृष्टिबिहीन रहेकी सिस्टर एन्ड्रीले आउँदो बुधबार ११७ औँ जन्मदिन मनाउने तयारी गरेकी छन् ।सन् १९०४ को फेब्रुअरी ११ मा जन्मिएकी उनी युरोपकी सबैभन्दा पाको उमेरकी व्यक्ति समेत हुन्।