नेपाल विद्युत प्राधिकरणका प्रमुख कुलमान घिसिङले नेपालकै नदीमा पानीजहाज चलाउन सकिने खुलासा गरेका छन् । उनका अनुसार नेपालको नदी भएर काठमाडौंको नजिकैसम्म भारतबाट पानीजहाज आउन सक्छ ।
यसअघि तत्कालिन प्रधानमन्त्री केपी शर्मा ओलीले हिन्द महासागरमा नेपाल झण्डा फहराइएको पानीजहाज चलाउने घोषणा गरेका थिए । त्यतिबेला विपक्षीहरुले उनको खिल्ली उडाएका थिए । तर, अहिले कुलमानले पानीजहाज चलाउने ओलीको सपनालाई अघि बढाउने जमर्काे गरेपछि ओलीका आलोचकलाई गतिलो जवाफ दिएको छ ।
शनिबार रामेछाप–काठमाडौं पत्रकार समाजको कार्यक्रमलाई काठमाडौंमा सम्बोधन गर्दै कुलमानले जापानी सहयोग नियोग (जाइका)ले २० वर्षअघि नै तयार पारेको जलविद्युतको सम्भाब्यता अध्ययनसहित एउटा रिपोर्ट र मास्टर प्लानमा कोशी बेसिनका नदीहरुलाई समेटेर २५ हजार मेगावाटभन्दा माथि बिजुली निकाल्न सकिने र त्यसैका माध्यमबाट काभ्रेको दोलालघाटसम्म भारतबाट पानी जहाज नै ल्याउन सकिने देखाइएको तथ्य बाहिर ल्याएका हुन् ।
उनका अनुसार यो रिपोर्ट सन् १९८५ मै बनेको थियो तर, अहिलेसम्म कार्यान्वयनमा आएको छैन । यद्यपी विद्युत प्राधिकरणको प्रमुख भएपछि कुलमानले यही मास्टर प्लानअनुसार आयोजनाहरु बनाउने प्रक्रिया अघि बढाउन राजनीतिक नेतृत्वसमक्ष पहल गरिरहेको जानकारी दिए ।
‘अब नदीको बेसिनमा आधारित भएर आयोजनाहरु बनाउनुपर्छ । यो रिपोर्टमा टेकेर आयोजनाहरु बनाउने हो भने नेपाललले मात्रै हैन, पुरै दक्षिण एसियाले यसबाट ठूलो फाइदा लिन सक्छ,’ कार्यक्रममा सञ्चारकर्मीसँग उनले भने– ‘ठूला जलाशययुक्त आयोजनाहरु बने नेपालमै पानीजहाजसम्म ल्याउन सम्भव छ । हामीले धेरै मेगावाट विजुली निकालेर निर्यात पनि गर्न सक्छौं । त्यसैले अब त्यतैतर्फ अघि बढ्नुपर्छ ।’
जाइकाको रिपोर्टअनुसार पानीजहाज चलाउन सप्तकोशी (चतरा)देखि सुनकोशी–३ (दोलालघाट) सम्म यो बीचमा ४ वटा ठूला जलाशययुक्त आयोजना बनाउने हो भने अहिले भारतको इलाहबादसम्म आउने गरेको पानी जहाजलाई काभ्रेको दोलालघाटसम्म ल्याउन सकिन्छ ।दैनिक नेपाल
