जनकपुरमा विवाह पञ्चमीको रौनक

यतिबेला दिनमा फुल माला र रातमा बत्तिले धपक्क बलेको छ जनकपुर धाम। जनकपुरको यो रौनकको रङ्ग त्रेता युगबाट आएको हो। अयोध्याका राजकुमार राम र मिथिलाकी राजकुमारी जानकीको विवाहको सम्झनामा आज विवाह पञ्चमी महोत्सव मनाइँदै छ। देशभरका सीता राम मन्दिरहरुमा विवाह पञ्चमीका अवसरमा राम र सीताको प्रतीकात्मक विवाह तथा पूजाआराधना गरिन्छ। जनकपुरमा साप्ताहिक रुपमा चल्ने यो उत्सवको मुख्य आकर्षण भनेको मिथिलाको संस्कृतिअनुसार राम सीताको प्रतीकात्मक स्वयंवर र विवाह हो। यो विवाह महोत्सवमा बाजागाजा, झाँकीसहित राम सीताको प्रतिमालाई सिंहासन र डोलामा राखी जनकपुरको रङ्गभूमिमा लगिन्छ। स्वयंवर र वैवाहिक विधि सम्पन्न भएपछि पुन सीता-रामलाई जानकी मन्दिरमा ल्याइन्छ । विवाह पञ्चमी महोत्सवमा काठमाडौंबाट गुठी संस्थानको टोली, भारतको अयोध्याबाट सीता-रामका अनुयाईहरु तथा अन्य श्रद्धालुहरू जन्तीको रुपमा सहभागी हुने गर्छन् ।