कपाल महिलाको पहिचान हो । लामो र सुन्दर कपालले महिलालाई आकर्षित तुल्याउनुको साथै व्यक्तित्व झल्काइरहेको हुन्छ । त्यसो भए कपाललाई लामो र सुन्दर बनाउन के गर्ने त ? कपाल छिटो बढाउन र आकर्षक बनाउन यी तरिका अपनाउनुहोस् ।
टाउको मसाज गर्नुहोस्
कपाललाई सुन्दर बनाउन तेलको मसाज नै सबैभन्दा राम्रो उपाय हो । मसाज गर्दा टाउकोमा रगतको पूर्णरुपमा सञ्चरित हुन्छ, जसले गर्दा कपालको पोषण तत्व कपालको फोलिकल्समा छिटो पुग्छ । अमला र निम जस्ता अन्य औषधिजन्य जडीबुटीबाट बनेका तेलहरू छन् । यस्ता तेलले टाउकोमा हुने संक्रमणलाई समेत रोक्छ ।
बोतलबाटै सीधै तेल टाउकोमा लगाउनुहोस्
तेल लगाउँदा आफ्नो औँलाहरूको सट्टा बोतलबाटै टाउकोमा सीधै तेल लगाउनुहोस् । यसबाट तेल सीधै कपालको जरासम्म पुग्छ र तपाईंको कपाललाई लामो र बलियो बनाउँछ ।
कपाल छाँटकाँट गर्नुहोस्
महिलाहरू आफ्नो कपाल छोटो हुने डरले काट्न डराउँछन् । तर, आफ्नो कपाललाई छिटो बढाउन चाहनुहुन्छ भने हरेक ६ देखि ८ हप्तामा कपाल छाँटकाँट गर्नु पर्दछ । जसले गर्दा तपाईंको कपाल फुट्ने र हाँगा निस्कने समस्याबाट छुट्कारा मिली कपाल छिटो बढ्छ ।
भिटामिनहरूको प्रयोग गर्नुहोस्
समय–समयमा आफ्नो कपाललाई विशेष हेरचाह गर्नुपर्दछ । सही भिटामिनको उपभोग र कपाललाई पोषण प्रदान गर्नु एक राम्रो तरिका हो । एन्टी अक्सिडेन्ट र भिटामिन ‘बी’ युक्त चक्कीले कपाललाई बलियो बनाउँछ । यो बाहेक कपाललाई स्वस्थ बनाउन बायोटिनजस्ता सप्लिमेन्टहरूको पनि महत्वपूर्ण भूमिका हुन्छ ।
सही स्याम्पुको प्रयोग गर्नुहोस्
सुन्दर कपालको लागि राम्रो स्याम्पुको प्रयोग गर्नु महत्वपूर्ण हुन्छ । स्याम्पुमा प्रायः भृंगिराज, निम, अमला, तुलसी, मध्याटिका शिकाकाई र रोजमेरी जस्ता जडिबुटीबाट बनाइएको हुन्छ । जसले कपाललाई मजबुत र सिल्की बनाउँछ ।
चिसो पानीले कपाल धुनुहोस्
नियमित स्याम्पु र कन्डिनरको प्रयोग गरेपछि चिसो पानीले धुनुपर्दछ । आफ्नो कपाललाई चिसो पानीमा भिजाउँदा वा चिसोपानीले नुहाउँदा शितल हुनुको साथै कपाल बलियो हुन्छ । तातो पानीले कपाल धुँदा तपाईंको कपाललाई सुख्खा र कमजोर बनाउने भएकोले तातोपानीले कपाल धुनुहुँदैन ।
