जनकपुरधाम– आजबाट औपचारिक रूपमा सञ्चालन आएको जयनगर–जनकपुर–कुर्था रेलको जनकपुरधाममा भव्य स्वागत गरिएको छ ।
नयाँ दिल्लीमा नेपालका प्रधानमन्त्री शेरबहादुर देउवा र भारतीय प्रधानमन्त्री नरेन्द्र मोदीले संयुक्त रूपमा भर्चुअल उद्घाटन गरेपछि जयनगरबाट हिँडेको रेल दिउँसो जनकपुधाम आइपुगेको हो ।
वर्षौको प्रतीक्षापछि औपचारिक रूपमा रेल चल्ने भएपछि निकै उत्साहित देखिएका सर्वसाधारणले दुलही झैँ सिंगारिएका रेलको जनकपुरधाममा स्वागत गरेका छन् ।
ऐतिहासिक यो क्षण हेर्न सर्वसाधारण बिहानै रेल्वे स्टेशन पुगेका थिए ।
स्टेशनमा सर्वसाधारणको व्यापक भीड लागेको थियो ।
विद्यार्थीहरूले पनि नेपाल र भारतका झण्डा फहराउँदै रेलको स्वागत गरेका थिए ।
जयनगरबाट जनकपुरधाम आएको रेल मुख्य स्टेशन कुर्था पुगेको छ ।
रेलवे विभागले ८४ करोड ६५ लाख रुपैयाँमा भारतसँग रेलको दुई सेट खरिद गरेको थियो ।
भारतकै लगानीमा जयनगरदेखि कुर्थासम्म ३४.९ किलोमिटरमा रेलवेको ब्रोडगेज ट्रयाक तयार भएको हो ।
रेलका प्रत्येक सेटमा इन्जिनसहित ५ वटा बोगी छन् । चारवटा बोगीमध्ये एउटा एसी कोच र ३ वटा जेनरल बोगी रहेका छन्
भारतको हैदरवाद हाउसमा नेपाल–भारत उच्चस्तरीय बैठक सम्पन्न भएपछि आज चार वटा परियोजनाको उद्घाटन गरिएको थियो । त्यसमध्ये बहुप्रतीक्षित जयनगर–जनकपुर–कुर्था रेल सेवाको पनि उद्घाटन गरिएको हो ।
उद्घाटन दिल्लीमा भएको छ भने जनकपुरधाम आजै औपचारिक कार्यक्रम हुन लागेको छ ।
भौतिक पूर्वाधार तथा यातायातमन्त्री रेणु यादवको प्रमुख आतिथ्यतामा औपचारिक कार्यक्रम हुन लागेको हो ।
कार्यक्रम संघ तथा मधेश प्रदेशका पदाधिकारी साथै भारतीय राजदूतावासलगायत प्रतिनिधि पनि सहभागी हुने छन् ।
रेल आइतबारबाट नियमित रूपमा चल्ने नेपाल रेल्वे कम्पनीका महाप्रबन्धक निरञ्जन झाले जानकारी दिएका छन् ।
