चितवनको भरतपुर महानगरपालिका वडा नम्बर १९ मा शुक्रबार हुने निर्वाचनमा झण्डै चार हजार मतदाताले मतदान गर्ने भएका छन् । शुक्रबार बिहान ७ बजेखि बेलुका ५ बजेसम्म मतदानको समय तय गरिएको छ । मंगलबार चुनावको मिति घोषणा भएसँगै मौन अवधि सुरु भइसेको छ । मौनअवधि सुरु भएसँगै उम्मेदवारले औपचारिक रुपमा प्रचारप्रसार गरेका छैनन् ।
वडा नम्वर १९ मा ३ वटा मतदानस्थल तय गरिएको छ, जहाँ ६ वटा मतदान केन्द्र रहनेछन् । जीवनज्योति राप्रावि गुञ्जनगर, शारदानगर उच्च मावि शारदानगर र किरणगञ्ज मावि रानीपोखरीमा मतदानस्थल तय गरिएको छ । जीवनज्योति राप्रावि केन्द्रमा १३ सय मतदाता छन् भने शारदानगरमा १२४१ र किरणगञ्जमा १२४३ मतदाता छन् ।यसअघि वडा नम्बर १९ मा २ हजार ८६० मत खसेको थियो । वडा नम्बर १९ मा ३ हजार ७९७ मतदाता छन् । वडा नम्बर १९ को गणना अघिसम्म देवी ज्ञवालीले रेणु दाहालले भन्दा ७८४ बढी मत ल्याउएका छन् । २० नम्बर वडाको मत गणना गर्न बाँकी नै छ ।
२७ वटा वडाको अन्तिम परिणाम अनुसार, एमालेका मेयरमा उम्मेदवार देवी ज्ञवालीले ४० हजार ९८० मत ल्याएका छन् त्यस्तै माओवादी कांग्रेस गठबन्धनकी उम्मेदवार रेणु दाहालको ४० हजार १९४ मत ल्याएकी छन् । निर्वाचन अधिकृतको कार्यालय चितवनले दलसँगको बैठकपछि भरतपुर–१९ को २८०७ बदर मतलाई दलीय प्रतिनिधिको सहभागितामा मतगणनास्थल भरतपुरको कभर्डहलको परिसरमा जलाएर नष्ट गरेको थियो ।
