यौन दुर्बलता भन्नाले यौन क्रियाकलापमा कठिनाई अनुभव गर्नु हो। यो पुरुष र महिला दुवैमा हुन सक्छ र यसका धेरै कारणहरू हुन सक्छन्। यौन इच्छा (Sexual Desire वा Libido) एक जैविक र मनोवैज्ञानिक प्रक्रिया हो जसले यौन क्रियाकलापमा संलग्न हुन वा यौन उत्तेजना अनुभव गर्न चाहना जगाउँछ। यो एक जटिल कुरा हो जुन विभिन्न शारीरिक, हर्मोनल, मनोवैज्ञानिक, सामाजिक र सम्बन्धित कारकहरूबाट प्रभावित हुन्छ।

यौन इच्छा व्यक्त गर्ने तरिकाहरू व्यक्तिअनुसार फरक हुन सक्छन्। कसैलाई यौन क्रियाकलापमा सक्रिय रूपमा संलग्न हुन मन लाग्छ भने कसैलाई यौन कल्पना वा उत्तेजनामा मात्र सन्तुष्टि मिल्न सक्छ।

यौवन अवस्था र युवा वयस्कतामा यौन चाहना सामान्यतया उच्च हुन्छ । यौन दृश्य, स्पर्श, कल्पना वा अन्य उत्तेजनाहरूले यौन चाहना जगाउँछ। नयाँ सम्बन्धको सुरुवातमा धेरै व्यक्तिहरूले तीव्र यौन आकर्षण र चाहना अनुभव गर्छन्। यो नयाँपन र उत्साहको कारणले हुनसक्छ। आफ्नो शरीर र यौन क्षमतामा आत्मविश्वास भएको व्यक्तिमा यौन चाहना बढी हुन्छ। साथै आफ्नो पार्टनरसँग बलियो भावनात्मक र रोमान्टिक सम्बन्ध भएको व्यक्तिमा यौन चाहना बढी हुनसक्छ। पार्टनरसँग खुला र स्वस्थ यौन सञ्चारले यौन सन्तुष्टि र चाहना बढाउन सक्छ। शारीरिक र भावनात्मक घनिष्ठताले यौन इच्छालाई प्रोत्साहित गर्छ।

यौन इच्छामा उतारचढाव आउनु सामान्य कुरा हो। यो उमेर, तनाव, सम्बन्धको अवस्था, स्वास्थ्य स्थिति र हर्मोनल परिवर्तन जस्ता कुराहरूमा निर्भर गर्दछ। तर यदि यौन इच्छामा लगातार कमी आएको छ र यसले तपाईंको जीवनमा नकारात्मक असर गरिरहेको छ भने, यो कुनै अन्तर्निहित कारणको सङ्केत हुन सक्छ जसलाई ध्यान दिन आवश्यक छ।

पुरुषहरूमा यौन दुर्बलताका केही उदाहरणहरू:

इरेक्टाइल डिसफंक्शन (Erectile Dysfunction): यौन उत्तेजना हुँदा पनि लिङ्गमा पर्याप्त तनाव नआउनु वा आए पनि टिकाइराख्न नसक्नु।
शीघ्र स्खलन (Premature Ejaculation): इच्छा हुनुभन्दा पहिले नै स्खलन हुनु।
विलम्बित स्खलन (Delayed Ejaculation): यौन उत्तेजना भए पनि स्खलन हुन धेरै समय लाग्नु वा स्खलन नहुनु।
कम कामेच्छा (Low Libido): यौन इच्छामा कमी आउनु।
महिलाहरूमा यौन दुर्बलताका केही उदाहरणहरू:

कम कामेच्छा (Low Libido): यौन इच्छामा कमी आउनु।
यौन उत्तेजना सम्बन्धी समस्या (Sexual Arousal Disorder): यौन उत्तेजित हुन कठिनाई हुनु।
ओर्गास्म सम्बन्धी समस्या (Orgasmic Disorder): चरम सुख (ओर्गास्म) प्राप्त गर्न कठिनाई हुनु।
यौन दुखाइ सम्बन्धी समस्या (Sexual Pain Disorder): यौन सम्पर्कको समयमा वा पछि दुखाइ महसुस हुनु।
यौन दुर्बलताका शारीरिक र मानसिक दुवै कारणहरू हुन सक्छन्।

शारीरिक कारणहरूमा:

मधुमेह
उच्च रक्तचाप
हृदय रोग
मल्टिपल स्क्लेरोसिस
हर्मोनल असन्तुलन
केही औषधीहरूको साइड इफेक्ट
धूम्रपान र मद्यपान
मानसिक कारणहरूमा:

तनाव
चिन्ता
अवसाद
सम्बन्धमा समस्या
यौन दुर्व्यवहारको इतिहास
शरीरको बारेमा नकारात्मक सोच
-पत्रपत्रिकाको सहयोगमा