झापा, ९ भदौ -भारत पश्चिम बंगालको सिलगढीमा पक्राउ परेर भारतीय प्रहरीको हिरासतमा राखिएका नेपाली नागरिक उदय फागो १७ दिनपछि मुक्त भएका छन् ।
इलाम जिल्लाको सूर्योदय नगरपालिका–१० फिक्कल घर भएका उनलाई गत साउन २३ गते दिउँसो भारतको सिलगढी नगरस्थित फेमिली क्लिनिकमा आमाको उपचार गराउन गएका बेला भारतीय प्रहरीले पक्राउ गरी दार्जिलिङको गोर्खाल्याण्ड आन्दोलनमा सघाएको आरोप लगाएको थियो ।
सिलगढीस्थित भारतीय अदालतबाट उनी तारेखमा रिहा भएर हिजो राति ९ बजे काँकडभिट्टा आएका थिए । फागोले भारतीय हिरासतमा रहँदा मानसिक यातना व्यहोर्नु परेको र आफू बाँचेर आएको प्रतिक्रिया दिए ।
आफूले कुनै गैरकानूनी काम नगरेको उल्लेख गर्दै उनले भारत सरकारले अनाहकमा आतंकवादीको जस्तो व्यवहार गरेकोमा दुःख व्यक्त गरे ।
