नयाँ दिल्ली- भारतीय प्रधानमन्त्री नरेन्द्र मोदीले नेपालको सबै क्षेत्रको विकासका लागि भारत सधै तत्पर रहने बताएका छन्।
भारत भ्रमणमा रहेका प्रधानमन्त्री केपी ओलीसँगको वार्तापछि संयुक्त सम्बोधनका क्रममा मोदीले भूपरिवेष्टित मुलुकको रुपमा रहेको नेपाललाई सागरसम्म जोड्नका लागि भारत पुल बन्ने धारणा राखे। 'सगरमाथाको देश सागरसम्म सिधा जोडिनेछ,' उनले भने, 'त्यसपछि नेपाल ल्यान्ड लिंक्ड मात्रै होइन वाटर लिंक्ड देश बन्नेछ।'
सम्बोधनअगाडि दुवै देशका प्रधानमन्त्रीहरुले संयुक्त रुपमा स्विच थिचेर वीरगन्जस्थित एकीकृत जाँच चौकीको उद्घाटन गरेका थिए। सम्बोधनका क्रममा प्रधानमन्त्री मोदीले भने,‘कनेक्टीभेटीको एक आयाम व्यापार र मानिसको आवागमनको पूर्वाधारमा आधारित हुन्छ।’
उनले एकीकृत जाँच चौकी भारत र नेपालबीच सदियौंदेखि रहँदै आएको भौगोलिक, सामाजिक, सांस्कृतिक तथा ऐतिहासिक सम्बन्धका लागि नयाँ राजमार्ग बन्ने दाबी गरे।
प्रधानमन्त्री मोदीले ३ चरणको चुनाव सम्पन्न भई नयाँ लोकतान्त्रिक बाटोमा नेपाल अघि बढेको भन्दै नेपाल सरकार र नेपाली जनतालाई बधाई दिएका थिए। ‘नेपाल राजनीतिक रुपमा नै नयाँ युगमा प्रवेश गरेको छ,' उनले भने, ‘यो भारतका लागि पनि सुखद छ।’
यसअघि नेपालको संविधानलाई स्वागत नगरेको भारतले यसपटक दुई राष्ट्रप्रमुख बीचको भेटमा संविधान संसोधनको विषयमा केही कुरा भए नभएको बारेमा भने मोदी प्रवेश नै गरेनन्। बरु नेपाल राजनीतिक परिवर्तका हिसाबले पछिल्लो अवस्थासम्म आइपुगेकोमा बधाई दिँदै भने, ‘नेपालको संघीय लोकतान्त्रिक व्यवस्थालाई मजबुत गर्न भारत विश्वकै सबैभन्दा ठूलो प्रजातान्त्रिक मुलुक हुनुका नाताले दुवै देशबीच आपसी सहयोग, विचार, विमर्श र अनुभवको आदानप्रदान जरुरी छ।’
प्रधानमन्त्री ओलीसँगको भेटवार्ताका क्रममा नेपालसँग यसअघि विविध सम्झौता तथा संयुक्त साझेदारीमा सञ्चालनमा रहेका आयोजनाहरुको प्रगति तथा कार्यान्वयनको सम्बन्धमा समीक्षा गरेको जानकारी दिए। उनले दुवै देश तेल पाइपलाइन, तराईमा निर्माणाधीन हुलाकी राजमार्ग र एकीकृत जाँच चौकीको निर्माण कार्यमा गति दिने सहमतिमा पुगेको बताए।
प्रधानमन्त्री मोदीले नेपाल र भारत दुवै कृषिप्रधान देश भएको बताउँदै यस क्षेत्रमा पनि सहयोगका नयाँ कार्यक्रम सञ्चालन गर्नेमा वार्ता सकारात्मक बनेको उल्लेख गरे। उनले भने, ‘अर्गानिक कृषि उत्पादन, पशुपालन, माटो परीक्षण, कृषि अनुसन्धान र कृषि शिक्षा लगायतमा नेपाललाई भारतले सहयोग गर्नेछ।’
प्रधानमन्त्री कार्यालय हैदराबाद हाउसमा दुई राष्ट्रप्रमुखबीच भएको वार्तामा जल संशाधान तथा ऊर्जा क्षेत्रमा सुरु भएका आयोजनाको प्रगतिको पनि समीक्षा गरिएको छ। दुवै राष्ट्रप्रमुख पञ्चेश्वर परियोजना, अरुण–३ जलविद्युत आयोजना, सप्तकोसी तथा सुनकोसी लगायतका आयोजनाहरु निर्माणको कामलाई गति दिन सहमत भएका छन्।
नेपाल र भारतका बीचमा रक्षा तथा सुरक्षाको क्षेत्रमा गहिरो सम्बन्ध रहिआएको तर्क गर्दै मोदीले खुला सिमानाको दुरुपयोगलाई रोक्न तथा साझा सुरक्षा हितलाई अगाडि बढाउन पनि दुवै देश एक ठाउँमा उभिएको बताए। उनले जनकेन्द्रित सेवाका क्षेत्रमा लगानी बढाउँदा दुवै देशको विकासको योजना साकार गर्न महत्वपूर्ण सहयोग पुग्ने धारणा राखे।
प्रधानमन्त्री मोदीले आफ्नो व्यस्त समयको बावजुद पनि भारत भ्रमणमा आएको भन्दै प्रधानमन्त्री ओलीलाई धन्यवाद दिएका थिए। उनले नेपालीमा ‘फेरि भेट होला’ भन्दै आफ्नो सम्बोधन टुंग्याएका थिए। नेपाल लाइभ बाट साभार
